कोरोना संक्रमित भएको परिवारका सदस्यले जान्नै पर्ने ५ कुरा
नेपालमा अहिले कोरोना भाइरसको दोस्रो लहर जारी छ । यो लहरमा धेरै मानिस संक्रमित भएका छन् । यसले गम्भीर समस्या निम्त्याएको विज्ञहरु बताउँछन् । तर कोभिड व्यवस्थापनका लागि हामीले के गर्नसक्छौँ ? यो बारेमा जान्नै पर्ने हुन्छ । कोभिड १९ व्यवस्थापन गर्नका लागि स्वास्थ्य मन्त्रालयले दिएको जानकारी अनुसार परिवारका सदस्यले ५ वटा चरणहरु जान्नैपर्छ ।
यी हुन् ५ चरणः
१. कोरोना परीक्षण
यदि परिवारको सदस्य कसैलाई कोभिड १९ संक्रमण भएको आशंक लागेमा तत्काल कोरोना परीक्षण गराउनुपर्छ ।
२. संक्रमितको हेरचाह
संक्रमितलाई छुट्टै कोठामा राख्ने, पौष्टिक खानेकुरा खुवाउने, आराम गराउने, संक्रमितले प्रयोग गरेका सामान अलग्गै राख्ने ।
३. ज्वरो र अक्सिजनको स्तर
-पल्स अक्सिमिटरले संक्रमितको शरीरको अक्सिजनको स्तर जाँच गर्ने ।
-शरीरको अक्सिजनको स्तर बढाउन संक्रमितलाई घोप्टो परेर सुत्न लगाउने ।
-ज्वरो आएमा प्यारासिटामोल खाने र पानी पट्टी लगाउने ।
-ज्वरो ४,५ दिनसम्म पनि कम नभएमा स्वास्थ्यकर्मीसँग तत्काल परामर्श गर्ने ।
४. अस्पतालमा कुन बेला लग्ने ?
-नजिकको अस्पताल वा स्वास्थ्यकर्मीहरुसँग फोन मार्फत् निरन्तर सम्पर्कमा रहने ।
-स्वास्थ्यकर्मीको सल्लाह बमोजिम तथा संक्रमितको अवस्था हेरि समयमा नै अस्पताल लैजाने व्यवस्था गर्ने ।
-ज्वरो नघटेमा, छाती दुख्नुका साथै खोकी ठीक नभएमा, शरीरमा अक्सिजनको मात्रा कम भई अफ्ठ्यारो महशुस भएमा, संक्रमित स्वयंले आफ्नो हेरचाह गर्न नसक्ने देखिएमा, वा बोली लरबरिन थालेमा तत्काल अस्पताल लग्ने ।
५. परिवारका अन्य सदस्यसँग शतर्क रहने
-एक व्यक्तिले मात्र संक्रमितको हेरचाह गर्ने ।
-परिवारका अन्य सदस्यमा पनि कोरोना संक्रमण हुनसक्ने भएकोले शतर्क रहने ।
-संक्रमित परिवारका अन्य सदस्यको मानसिक स्वास्थ्यको विशेष ख्याल राखौँ ।
