काठमाडौं उपत्यकामा निषेधाज्ञा उल्लंघन गर्ने ६२ हजार सवारीसाधन र ३५ हजार जना मानिस कारवाहीमा परेका छन् । महानगरीय ट्राफिक प्रहरी महाशाखाका अनुसार २२ गते अर्थात शनिबारसम्म निषेधाज्ञा उल्लंघन गर्नेबाट झण्डै १३ लाख रुपैयाँ राजश्व संकलन भएको छ ।
कोरोनाको दोस्रो लहर फैलिएसँगै सरकारले गत वैशाख १६ देखि देशका अधिकांश जिल्लामा निषेधाज्ञा जारी गरेको थियो । जसमा खाद्यान्न, खानेपानी, ग्यास, औषधि, एम्बुलेन्स, पशुपंक्षीका दाना लगायत अत्यावश्यक सामान ढुवानी गर्ने सवारीसाधन बाहेक अरु सबै ठप्प छन् ।
यद्यपि, कतिपय निजी सवारीसाधन भने मनोमानी ढंगले कोरोनाको बेवास्ता गर्दै सरकारको आज्ञालाई अटेर गरी सडकमा निस्किएकालाई कारबाही गरिएको महानगरीय ट्राफिक प्रहरी महाशाखाका सह–प्रवक्ता डिएसपी सुनिल जंग शाह बताउँछन् ।
यसरी काठमाडौं उपत्यकामा निषेधाज्ञा उल्लङ्घन गर्ने मानिस र सवारी साधन गरी यो अवधिमा सरकारले ३७ दिनमा १२ लाख ९४ हजार २ सय रुपैयाँ राजस्व संकलन भएको छ ।
‘अत्यावश्यक काम बाहेक गुड्ने सवारी साधनलाई साँझ ७ बजेसम्म होल्ड गर्र्ने गरेका छौं,’ उनले भने, ‘निषेधाज्ञा जारी भएदेखि जेठ २० गतेसम्म नियम उल्लङ्घन गर्ने ६२ हजार ६ सय ६२ वटा सवारी सधान होल्डमा परेका छन् ।’
यसमा ४४ हजार ५ वटा दुई पाङ्ग्रे सवारी साधन रहेका छन् भने १४ हजार ५ सय ६२ वटा चार पाङ्ग्रे र ४ हजार ९५ ठूला सवारी साधन रहेका छन् ।
महाशाखाका अनुसार अधिकांश निर्माण, संस्था र निजीका सवारी सधान कारबाहीमा पर्ने गरेका छन् । दिनभरी होल्ड गरिएको सवारी सधान साँझ ७ बजेपछि सम्बन्धित धनी र कार्यालयलाई बुझाउने गरिएको छ ।
काठमाडौं उपत्यकामा निषेधाज्ञा उल्लङ्घन गर्ने मानिस र सवारी साधन गरी यो अवधिमा सरकारले ३७ दिनमा १२ लाख ९४ हजार २ सय रुपैयाँ राजस्व संकलन भएको छ ।
त्यस्तै, उपत्यकामा अनावश्यक हिँडडुल गर्ने मानिस ३५ हजार २ सय ६७ जना कारवाहीमा परेका छन् । तर, होल्डमा परेका सबैजना जरिवानामा नपर्ने महानगरिय प्रहरी परिसर, टेकुका सहायक उप–निरिक्षक रेवन्त गिरी बताउँछन् ।
‘होल्डमा परेका सबैलाई कारवाही गरिँदैन, कसैलाई सम्झाएर पठाउने गरेका छौँ’, गिरी भन्छन् ,‘ कोही अटेर गरेर फेरि आउँछ भने एक सय रुपैयाँ जरिवाना लिने गरेका छौँ ।’
