यस्ता हुन्छन् निमोनियाका लक्षण, कसरी बच्ने ?
डा.निरज बम, छाती रोग विशेषज्ञ
निमोनिया भन्नाले कुनै जिवाणुबाट फोक्सोमा हुने संक्रमणलाई बुझिन्छ । कुनै भाइरस, ढुसी, भ्याक्टेरिया र विभिन्न रसायनको कारणले निमोनिया हुने गर्दछ । रोग प्रतिरोधात्मक क्षमता कम भएका व्यक्ति, दीर्घरोगी, दम, सुगर, क्यान्सर, कलेजो र मिर्गौला प्रत्यारोपण गरेका, वृद्धा र ७ वर्ष मुनिका बालबालिका निमोनियाको जोखिममा रहन्छन् । अहिले अधिकांश कोरोना संक्रमितमा निमोनियाको समस्या देखिएको छ ।
जसले गर्दा आईसियु वा भेन्टिलेटरमा राखेर उपचार गराउनुपर्ने अवस्था छ । यस्तो अवस्थामा निमोनिया कसरी हुन्छ ? यसबाट कसरी बच्न सकिन्छ ? यसका लक्षण के हुन् भन्ने बारे वरिष्ठ छाती रोग विशेषज्ञ डा. निरज बमको सुझाव यस्तो छ ।
निमोनियाका लक्षण
– खोकी लाग्ने
– खकारमा रगत देखापर्ने ।
– श्वास फेर्न गाह्रो हुने
– टाउको दुख्ने
– छाती दुख्ने
– शरीर कमजोर हुने
– भोक नलाग्ने
– खानामा नरुच्ने
– पखला लाग्ने
– ज्वरो आउने
कसरी जोगिने ?
– कोरोना र निमोनियाको लक्षण करिव मिल्दो जुल्दो छ जसकारण केही समस्या देखिएमा तुरुन्तै उपचार गर्ने तर्फ ध्यान दिने ।
– श्वास फेर्न गह्रो हुने र अक्सिजनको लेबल घट्ने समस्या देखिएमा निमोनिया जाँच गराउने । निमोनिया देखिएमा अनिवार्य पीसीआर जाँच गराउनु पर्छ ।
– कोभिड र निमोनियासँगै देखा परेका व्यक्तिलाई अस्पताल भर्ना गरेर उपचार गर्नुपर्छ ।
– चिकित्सकको सल्लाहमामात्र औषधि सेवन गर्ने ।
– दीर्घरोगीहरुले निमोनियाको खोप लगाउने ।
– नियमित मास्कको प्रयोग गर्ने ।
– वातावरणमा भएको धुवाँ धुलोबाट बच्ने ।
