गिजासम्बन्धी समस्याको कारण र बच्ने उपाय

शरीरका अन्य अङ्गहरूको जस्तो दाँतको पनि महत्व एकदमै धेरै छ । जब दाँतको कुरा आउँछ, यसलाई समात्ने गिजालाई बेवास्ता गर्न सकिँदैन । गिजामा हुने समस्याको प्रत्यक्ष असर दाँतमा पर्छ ।
त्यसैले, गिजा सुन्निनु, ब्रस गरेपछि रगत आउनु, दाँत हल्लिनु, मुखबाट लगातार दुर्गन्ध आउनु, यी सबै गिजाको समस्याका लक्षण हुन् ।

जब यी लक्षणहरू देखा पर्छन्, यसको उपचार तुरुन्तै शुरु गर्नुपर्छ, किनभने प्रारम्भिक चरणमा यसबाट छुटकारा पाउन सजिलो हुन्छ । तर, जति समस्या बढ्दै जान्छ त्यो निकै कठिन बन्दै जान्छ ।

गिजासम्बन्धी समस्याको कारण

– गिजासम्बन्धी समस्या गराउने मुख्य कारण भनेको दन्तेलेउ हो । हरेकपटक खाना खाएपछि खाएको खाना दाँतमा टाँसिन्छ र लेउ बनेर बस्छ । यही दन्तेलेउ नै गिजासम्बन्धीको समस्याको मूल कारण हो ।
यदि, दन्तेलेउ समयमा नै हटाइएन भने यो कडा हुँदै जान्छ । जसले गर्दा गिजाको संक्रमण देखा पर्दछ ।
– शरीरका अन्य रोगहरू जस्तै, मधुमेहको कारणले पनि गिजाको समस्या देखिन्छ ।
– हर्मोनल गडबडीले पनि गिजामा नकारात्मक असर पारिरहेको हुन्छ ।
– धूम्रपान सहितका सुर्तीजन्य पदार्थको सेवनले पनि गिजाको समस्या देखिने गर्छ ।

लक्षण

– गिजाको रङ्ग विस्तारै बदलिँदै रातो हुनु,
– गिजा चलाउँदा वा ब्रस गर्दा रगत आउनु,
– संक्रमण बढ्दै जाँदा आफैँ रगत आउनु,
– गिजाको संक्रमण फैलिँदै जाँदा दाँतलाई सपोर्ट गर्ने भागहरूमा पनि समस्या देखिनु,
– गिजा पहिलेको ठाउँभन्दा तलतिर सर्दै जानु,
– दाँतको बीचमा खानेकुरा अड्किनु,
– दाँत हल्लिनु तथा दाँतहरूको बीचको दूरी बढ्दै जानु,
– गिजा क्रमशः सुन्निँदै जानु,
– दाँत र गिजाको बीचबाट रगत पिप आउनु,
– मुखबाट गन्ध आउनु,

बच्ने उपाय

– दिनको दुईपटक खाना खाइसकेपछि उपयुक्त तरिका प्रयोग गरेर दाँत माझ्ने । दाँत माझ्नको लागि नरम ब्रसको साथसाथै फ्लोरिडेटेड पेस्टको प्रयोग गर्ने ।
– दाँत माझ्नुको साथै हरेकपटक खाना खाइसकेपछि राम्रोसँग कुल्ला गर्नुपर्छ, जसले दाँतमा दन्तेलेउ जस्तो फोहोर बस्न दिँदैन ।
– दाँतको बीच–बीचमा रहेका फोहोरहरू ब्रस गर्दा ननिस्किन सक्छ । त्यसैले, डेन्टल फ्लस, इन्टरडेन्टल ब्रसको प्रयोग गरेर निकाल्न सकिन्छ ।
– खानेकुराहरूमा पनि विशेष ध्यान दिनुपर्दछ । दाँतमा टाँसिने वा गुलिया खानेकुराहरू एकदमै कम मात्रामा खानुपर्छ ।
– धूम्रपान तथा सुर्तीजन्य पदार्थको सेवन गर्ने बानी छ भने त्यो बानीलाई बिस्तारै छोड्नुपर्छ ।
– चिकित्सकको सल्लाहबमोजिम माउथवास तथा पेस्टहरू प्रयोग गर्नुपर्छ ।
– शरीरमा मधुमेहजस्तो किसिमका रोगहरू छ भने गिजासम्बन्धी समस्याहरू आउन नदिन विशेष ध्यान दिनुपर्छ ।
– कम्तीमा पनि ६ महिनादेखि एक वर्षभित्र अस्पताल गएर दन्त चिकित्सक वा विशेषज्ञ चिकित्सकसँग सल्लाह लिनुपर्छ । यसो गरेमा दाँतसम्बन्धी रोगहरूबाट छुटकारा पाइन्छ ।

यो पनि…
चिसोयाममा घुँडा दुख्ने समस्याबाट यसरी बच्नुहोस्
आज विश्व क्यान्सर दिवस : क्यान्सरबाट बच्न के खाने के नखाने ?