घरेलु उद्योग तथा साना पसल व्यवसाय कहाँ दर्ता गर्ने ?

पछिल्लो समय व्यापार तथा घरेलु उद्योगमा जोडीनेको संख्या बढ्दो छ । सानो लगानी होस् या ठुलो लगानी कुनै पनि सामान उत्पादन गर्ने उद्योग र खरिद–बिक्री हुने व्यवसाय दर्ता गरेर मात्र चलाउनुपर्छ ।

लामो समयदेखि उद्योग व्यवसायमा संलग्न भएकाहरुलाई त व्यवसाय दर्ता गर्न तथा नविकरण गर्न कहाँ जाने भन्ने जानकारी हुन्छ । तर, नयाँ व्यवसाय सुरु गर्नेहरु यस विषयमा अनभिज्ञ नै हुन्छन् । दर्ता गर्नुपर्छ भन्ने ज्ञान भएपनि कहाँ दर्ता गर्ने ? दर्ता गर्न कति खर्च लाग्छ र दर्ता गरेर व्यापार व्यवसाय गर्दा के के फाइदा हुन्छ लगायतका जानकारी कमैलाई मात्र हुन सक्छ । व्यवसायको प्रकृति हेरेर विभिन्न निकायमा दर्ता हुन्छ । दर्ता नगरी घरेलु उद्योग तथा व्यवसाय सुरु गर्दा कारबाहीमा पर्न सकिन्छ ।

साना लगानीमा खुलेको खाजा पसल, कस्मेटिक, स्टेसनरी, खेलौना तथा किराना ब्यवसाय तथा उद्योग ५ लाख भन्दा कम लगानीमा खोलिएको छ भने त्यसलाई वडा कार्यालयमा दर्ता गरेर प्यान नम्बर लिएर चलाउन सकिन्छ ।

कहाँ जाने दर्ता गर्न ?

पहिले साना लगानीका व्यवसाय वाणिज्य विभाग वा साना तथा घरेलु कार्यालयमै दर्ता हुन्थे । देश संघीयतामा गएसँगै स्थानीय तहमा दर्ता गर्नुपर्छ । साना लगानीमा खुलेको खाजा पसल, कस्मेटिक, स्टेसनरी, खेलौना तथा किराना ब्यवसाय तथा उद्योग ५ लाख भन्दा कम लगानीमा खोलिएको छ भने त्यसलाई वडा कार्यालयमा दर्ता गरेर प्यान नम्बर लिएर चलाउन सकिन्छ ।

५ लाख भन्दा माथि र १० करोड भन्दा कम लगानीको उद्योग तथा व्यवसायलाई घरेलु तथा साना उद्योग विभागमा दर्ता गर्नु पर्छ । १० करोड भन्दा माथिको व्यवसाय उद्योग विभागमा दर्ता गर्नु पर्छ ।

दर्ता गर्न कति लाग्छ खर्च ?

– १ लाख देखि ३ लाखसम्म पुँजी भएकालाई वडा कार्यालयमा व्यवसाय दर्ता गर्न १ हजार रुपैँया लाग्छ ।
– ३ देखि ५ लाखसम्म पुँजी भएकालाई २ हजार
– ५ लाख देखि २० लाखसम्म पुँजी भएकालाई १२ हजार १ सय
– २० लाख देखि १ करोड पुँजी भएकालाई २० हजार
– १ करोड देखि ५ करोडसम्म पुँजी भएकालाई ३० हजार १ सय
– ५ करोड देखि १० करोड पुँजी भएकालाई ५० हजार

दर्ता गरेर पसल चलाउँदा के–के हुन्छन् फाइदा ?

दर्ता गरिसकेपछि कुनै पनि व्यावसायिक क्रियाकलाप राज्यको दायरामा हुने र सरकारले उद्योगीलाई दिने सुविधा पाइन्छ । दर्ता गरेपछि उद्योगीलाई प्यान, भ्याट र अन्य निकायको अनुमति लिन पनि सहज हुने उद्योग विभागका अनुमती दर्ता निर्देशक भक्तराज जोशी बताउँछन् । निर्देशक जोशी भन्छन्,‘उद्योग तथा व्यवसाय दर्ता भएपछि राज्यले दिने छुट, सुविधा, अनुदान र क्षमता वृद्धिका तालिमको अवसर पनि पाइन्छ ।’

दर्ता गरेर उद्योग व्यवसाय संचालन गरेपछि प्राइभेट फर्मलार्ई हरेक वर्ष नवीकरण गर्नु पर्ने हुन्छ । समयमा नविकरण गरिएन भने जरिवाना तिर्नु पर्ने हुन्छ ।

यो पनि पढ्नुहोस् :
मुटुका बिरामी घरमै कसरी सुरक्षित रहने ?
ट्राफिक र विमानबाट निस्किने आवाज मुटुका लागि खतरनाक !
चितवन मेडिकल कलेजमा मुटुको शल्यक्रिया पुनः सुचारु
यसकारण गरे शताब्दी पुरुषले शरीरदान (भिडियो सहित)
बढ्दै अङ्गदाता तर कार्यान्वयनमा समस्या
बस्नका लागि शरीरको अंग दान गर्नुपर्ने अनौठो गाउँ !
के हो टेस्ट ट्युब बेबी ? कति लाग्छ खर्च ?
मिर्गाैला प्रत्यारोपणपछि अझ सक्रिय हुनेहरू
प्राधिकरण भन्छ – अब उद्योगलाई छेलोखेलो बिजुली