‘नपाएको कुरा कसरी पाएँ भनौं र हजुर ! ८ दिन भइसक्यो एक बोरा चामल, १ पोको नुन-तेल सम्म पाएको छैन ।’ गहभरी आँसु पार्दै मेलम्चीकी बाढी पीडित गोपिनी रसाइली यही गुनासो गर्छिन् । इन्द्रावती र मेलम्ची नदीमा आएको बाढीले घरखेत सबै बगर बनायो । अहिले इन्द्रेश्वरी स्कुलमा नगरपालिकाले सञ्चालन गरेको भान्सामा बिहान बेलुका पेट भर्न पाएकी छिन् । तर, पीडितका लागि आएको राहत नपाएकोमा उनी दुःखी छिन् ।
‘त्रिपाल, उड्ने ओछ्याउने आएको छ भन्ने सुनेको छु तर हामीले पाएका छैनौं,’ गोपिनीभन्छिन्, ‘त्यो दिए पनि त हामी कतै सुरक्षित ठाउँमा गएर बस्थ्यौं नि ।’
‘बिहान बेलुका खान त दिएका छन्,’ उनी भन्छिन्, ‘तर, हाम्रा लागि भनेर आएको राहत कहाँ गयो, कि कसले राखेको छ थाहा छैन ।’ बाढी आउँदा गोपिनीको सबै परिवार घरभित्रै थिए । माथिबाट गाउँलेले छानोमा ढुंगा हानेर भाग,भाग….भन्ने आवाज सुनेपछि केही नसोची दौडिए । छिनभरमै घरमाथिबाट खोला हिड्न थाल्यो ।
आरनमा काम गरेर घरपरिवार चल्दै आएको रसाइलीको परिवार यतिबेला इन्द्रेश्वरी स्कुलको चिसो भुइँमा रात कटाइरहेको छ । यदि पीडितका नाममा आएको राहत सामग्री पाए कतै सुरक्षित ठाउँमा त्रिपाल हालेरै भएपनि बस्ने उनको सोच छ । तर, नगरपालिकाले जो पीडित हो उसलाई राहत नबाडेको उनको गुनासो छ । ‘त्रिपाल, उड्ने ओछ्याउने आएको छ भन्ने सुनेको छु तर हामीले पाएका छैनौं,’ उनी भन्छिन्, ‘त्यो दिए पनि त हामी कतै सुरक्षित ठाउँमा गएर बस्थ्यौं नि ।’
यो गुनासो गोपिनीको मात्र होइन । यतिबेला विभिन्न संघसंस्था तथा व्यक्तिहरुले मेलम्ची बाढी पीडितको नाममा आएको राहत पारदर्शी ढंगले वितरण नभएको भन्ने गुनासो धेरैको छ । बाढी पीडित लक्ष्मण गौतम विभिन्न स्थानबाट आएको राहत नगरपालिकाले सेनाको व्यारेकमा लगेर थुपारेको तर, अहिलेसम्म नबाँडेको बताउँछन् । ‘हामीले अहिलेसम्म राहत पाएका छैनौं,’ उनले भने, ‘पहुँच हुनेलाई मात्र नगरपालिकाले बाँडेको छ तर, जो पीडित हो उसले अहिलेसम्म राहत पाएको छैन ।’
मेलम्ची नगरपालिकाकी उप–प्रमुख भगवती नेपाल अहिले नगरपालिकाले खाना खुवाइरहेकाहरुलाई राहत नदिएको बताउँछिन्
यस्तै, बाढी पीडित सुन्दिपकुमार श्रेष्ठ मेलम्चीमा थुप्रै राहत आएको छ तर, अहिलेसम्म नपाएको बताउँछन् । ‘मेलम्चीमा आएको राहत पारदर्शी ढंगले वितरण गर्ने हो भने सबै पीडितलाई पुग्छ,’ उनले भने, ‘तर, नगरपालिका राहत नबाँडेर रमिता हेरेर बसिरहेको छ ।’
राहतको कुरा त एकातिर छ तर, बाढीले घर पुरेका मानिसहरु कस्तो अवस्थामा बसेका छन् ? के खाएका छन् ? उनीहरुको अवस्था के छ भन्ने बारेमा नगरपालिकाबाट चासो नदेखाइनुले पीडित झनै दुःखी भएको उनी सुनाउँछन् । ‘एकपटक के छ भनेर सोधेको भएपनि अलिकति मन रहन्थ्यो,’ उनी भन्छन्, ‘अर्बौंको क्षती भइसक्दा पनि नगरपालिकाका जनप्रतिनिधिहरु पीडितसामू आएका छैनन् ।’
मेलम्ची नगरपालिकाकी उप–प्रमुख भगवती नेपाल अहिले नगरपालिकाले खाना खुवाइरहेकाहरुलाई राहत नदिएको बताउँछिन् नगरपालिकाको तर्फबाट खाना खाइरहेकाहरुलाई राहत दिएका छैनौं,’ उनी भन्छिन्, ‘यहाँ खाना नखाने र आफैं बासस्थान व्यवस्थापन गरेर बसेकालाई हामीले राहत दिएका छौं ।’
