एक हप्ता लम्बियो उपत्यकाको निषेधाज्ञा, के गर्न पाइने के नपाइने ?
काठमाडौं उपत्यकामा थप एक हप्ताका लागि निषेधाज्ञा बढाइएको छ । उपत्यकाका तीन जिल्ला, काठमाडौं, भक्तपुर र ललितपुरका प्रमुख जिल्ला अधिकारीहरुको संयुक्त बैठकले निषेधाज्ञाको मोडालिटी केही परिवर्तन गरेर असार १४ गतेसम्म निषेधाज्ञा लम्ब्याएको हो ।
अब बार अनुसार व्यवसाय सञ्चालन गर्न दिइने भएको छ । जिल्ला प्रशासन कार्यालय काठमाडौंका प्रमुख जिल्ला अधिकारी कालीप्रसाद पराजुलीका अनुसार आइतवार, मंगलवार र बिहीवार सुनचाँदी, भाँडा, विद्युतीय, घरायसी सामान बिक्री गर्ने पसल सञ्चालन हुनेछन् । त्यस्तै, अटोमोबाइल र त्यसका पार्टपूर्जा पाइने पसल पनि खुल्नेछ ।
सोमवार, बुधवार र शुक्रवार सपिङ मल, खेलकुद सामग्री पसल, कपडा, जुत्ता पसल खोल्न दिने निर्णय भएको छ । यस्तै फेन्सी, कस्मेटिक, गिफ्ट र टेलरिङ खुल्नेछन् ।
बारका आधारमा खुल्ने पसल बिहान ११ देखि ४ बजेसम्म खोल्न दिने निर्णय भएको प्रजिअ पराजुलीले बताए । खाद्यान्न, फलफूल र तरकारी पसल हरेक दिन ११ बजेसम्म खुल्नेछ । त्यस्तै विवाह तथा ब्रतवन्धको हकमा बढीमा १० जनासम्म भेला हुने पाइने गरी जिल्ला प्रशासन कार्यालय काठमाडौंले निर्णय गरेको छ ।
निजी सवारीसाधनमा जोर बिजोर
८ गतेबाट निजी सवारीसाधनमा जोर बिजोर प्रणालीमा निजी सवारी चलाउन पाइनेछ । जसअन्तर्गत कार जीप र भ्यानमा बढीमा ४ जना, ट्याक्सीमा ३ जनामात्र राख्न पाइने जनाइएको छ ।
