अब डेढ घण्टामै बुटवल-नारायणगढ (ड्रोन तस्बिर)
राष्ट्रिय गौरवको आयोजना पूर्व-पश्चिम राजमार्ग अन्तर्गतको बुटवल-नारायणगढ सडकखण्ड बिस्तारले तीव्रता पाएको छ ।
२०१८ सालमा राजा महेन्द्रले शिलान्यास गरेको यो राजमार्ग करिव ६० वर्षपछि फराकिलो बन्न लागेको हो । उक्त सडकखण्डलाई दुई खण्डमा विभाजन गरी बिस्तार गर्न लागिएको छ । नारायणगढदेखि दाउन्नेसम्म खण्ड एक र दाउन्नेदेखि बुटवलसम्म खण्ड दुई गरी १ सय १४ किलोमिटर सडक फराकिलो बन्न लागेको हो ।
जस अन्तर्गत बरघाट, सुनवल र बुटवल ६ लेनको बन्ने छ, जंगलको भाग ४ लेन र दाउन्नेमा ३ लेनको सडक बिस्तार हुने आयोजनाले जनाएको छ । सडक बिस्तारको ठेक्का चाइनिज कम्पनी चाइना स्टेट कन्स्ट्रक्शनले लिएको छ ।
करिव १७ अर्ब रुपैयाँ लागतमा बिस्तार भइरहेको यो सडक सम्पन्न भइसकेपछि डेढ घण्टामै बुटवलबाट नारायणगढ यात्रा गर्न सकिन्छ । हाल यस सडकखण्ड पार गर्न करिव तीन घण्टा लाग्ने गरेको आयोजनाका इन्जिनियर शान्तिराम दाहालले बताए ।
सडक फराकिलो बन्दैछ’, उनले भने, ‘३ घण्टाको बाटो डेढ घण्टामै पार गरिन्छ’। उनकाअनुसार खण्ड २ अन्तर्गत पर्ने बुटवल दाउन्नेसम्म ७ प्रतिशत काम सकिएको छ ।
तस्बिर: राजकुमार श्रेष्ठ
यो पनि पढ्नुहोस्
कोरोना खोप लगाउनेको लाइन (फोटो फिचर)
