बाहुबली झरनाको उपमा ‘भांगे झरना’ (भिडियो पनि)
चारैतिर हरियाली, बीचबाट छङ–छङ बग्ने कञ्चन झरना, अग्लो ठाउँबाट झरेको पानी निकै मनमोहक तथा सुन्दर दृश्य ! यो हो रसुवा जिल्लाको उत्तरगया गाउँपालिका–२ डाँडागाउँमा रहेको भांगे झरना । यस झरनालाई दुई फरक स्थान बाट फरक–फरक दृश्यावलोकन गर्न सकिन्छ । पिँधबाट झरना झरेको सुन्दर दृश्य देखिन्छ भने झरनाको शिरबाट त्यहाँ वरिपरिको सम्पूर्ण दृश्य देख्न सकिन्छ ।
करिब दुई वर्ष अघिसम्म भांगे झरनाको कतै चर्चा थिएन । सामाजिक सञ्जालमा भाइरल भएपछि उक्त झरना हेर्न र रमाउन आउने आन्तरिक पर्यटकको भीड लाग्न थालेको छ । तलबाट माथि हेर्दा बाहुबली फिल्ममा देखाइने झरना जस्तै भएकाले भांगे झरनालाई ‘बाहुबली झरना’ पनि भनिन्छ ।
विशेष गरी बर्षायाम सुरु भएदेखि अर्थात् असारदेखि यहाँ पर्यटकको घुइँचो लाग्ने गर्दछ । यो समयमा झरनाको सुन्दरता हेर्न दिनहुँ मानिसहरू आउने गर्दछन् । तर बिदाको दिन भने झरना हेर्नेको भिड थामिनसक्नु हुने गरेको स्थानीय पर्यटन व्यवसायीहरू बताउँछन् । झरना हेर्न छिमेकी जिल्ला नुवाकोट, काठमाडौँ, ललितपुर, भक्तपुर, धादिङ चितवन, गोर्खा, मकवानपुरलगायतबाट पनि आउँछन् । झरना हेर्न पुग्ने धेरैजसो युवायुवतीहरू पौडी खेल्ने, झरनामा नुहाउने, टिकटक बनाउने, फोटो खिच्ने, भिडियो बनाउने गर्छन् ।
नेपाल–चीनको अन्तर्राष्ट्रिय सडक बेत्रावती–मैलुङ–स्याफ्रुबेशीमा पर्ने भांगे झरना सडकको मैलुङ नजिक पर्दछ । झरना बेत्रावती बजारबाट करिब ५ किमीको दुरीमा उत्तरतर्फ पर्दछ । राजधानी काठमाडौँदेखि करिब ४ घण्टाको यात्रामा यस झरनामा पुग्न सकिन्छ । यहाँ खान बस्नको लागि स–साना होमस्टे सञ्चालन गरिएको छ ।
भिडियो :
यो पनि…
यात्रा खयर भारानीको (भिडियो पनि)
धार्मिक सहिष्णुता र सांस्कृतिक विविधताले सम्पन्न धारापानी (भिडियो पनि)
धार्मिक तथा ऐतिहासिक महत्व बोकेको ताकमकोट (भिडियो पनि)
सुन्दर मच्छिम गाउँ (भिडियो पनि)
