पापा मेरो ‘रोल मोडल’

म बालपनका ती दिन नित्य सम्झन्छुु– मेरा साथीहरु प्रख्यात स्टार र सेलिब्रेटी खोज्थे अनि आफ्ना रोल मोडल भन्नुमा गर्व गर्थे ।

म भने त्यो भाग्यमानी थिएँ, जसका लागि टाढा जानै पर्दैन थियो । जो मेरै घरमै हुनुहुन्थ्यो ।

मेरालागि पापा नै रोल मोडल र सुपरहिरो हुनुहुन्छ, सधैं ।

म ती बालबालिकालाई नियाल्छु, जो अहिले वयस्क भइसके अनि जसले मेरो पापाका पौरख देखेका छन् । त्यो व्यक्ति जसले १० जना मान्छेमाथि उफ्रिएर/नाघेर फ्लाइङ किक हान्न सक्यो र ‘यो नाथे केही होइन’ भनेजसरी काठको बोर्ड भाँचिदियो । जसले देखाएको कलात्मक तागत ‘एक्सन मुभी’ को हिरोको भन्दा कम थिएन । म दर्शकदीर्घाको अघिल्लो पंक्तिमा थिएँ । त्यस क्षण सबैले ‘तुलसीको छोरा’ भन्नुको गौरव अवर्णनीय छ ।

उहाँसँग मानिसलाई तत्काल प्रभावित गर्ने खुबी छ । चमकता छ । पूर्णता छ । शुद्धता छ ।

उहाँ अथक् प्रयत्नशील हुनुहुन्छ । उहाँका लक्ष्यप्राप्तिमा कुनै सीमा वा बन्धनले रोक्न सकेनन् । सक्दैनन् । बाधा–व्यवधानलाई उहाँले त्यो काठको बोर्डझैं टुक्रा–टुक्रा पारिदिनुभयो । उहाँमा त्यो अदम्य क्षमता छ ।

यो पनि…
नटेर्ने, नझुक्ने, तेक्वान्दो नछोड्ने

जब उमेर ढल्किँदै बुढ्यौलीतिर प्रवेश गर्नुभयो, उहाँले आफ्नै मूल्य–मान्यता, आचार र सिद्धान्त निर्माण गर्नुभयो । उहाँको विद्वत् गुण जागरूक हुँदै गयो । ढाँट, छल र झुट समाचारको व्यापकता रहेको नयाँ विश्वमा जीवनको आदर्शलाई उहाँले कहिल्यै त्याग्नुभएन । म मेरो पापामाथि पूर्ण विश्वास गर्छु कि बरू चोट सहनु परोस्, उहाँले कहिल्यै छलछामको सहारा लिनुभएन । बेइमानीको बाटो कहिल्यै समाउनुभएन ।

पापा, हजुरले यस्तो गुण विकास गर्नुभएको छ, जो लिन होइन, दिन अग्रसर हुन्छ । दीन–दुःखी र जरूरी परेकालाई सहयोग गर्न तत्पर रहन्छ । र, मातृभूमि नेपालको समृद्धि हेर्न चाहन्छ । तपाईंको दयाभाव निरन्तरताको द्योतक हो, जुन सत्कार्यहरु म आफू अनुकरण गर्नेछु र भविष्यमा मेरा सन्ततिसम्म हस्तान्तरण गर्दै जानेछु ।

यो पनि…
कठोर गुरू, मिलनसार मित्र

यी समग्रताका लागि धन्यवाद । तपाईंको छोरा हुन पाउनु मेरालागि अहोभाग्य हो । आई लभ यू पापा ।

अन्त्यमा, मैले सुनेको एउटा कथनसहित यो आलेख बिट मार्न चाहन्छु, जसले मेरो पापाको विशेषता संक्षेपमा बताउनेछ–

‘शक्तिले हामीलाई मोहित गराउँछ तर सम्झिइरहने गुणचाहिँ दया हो ।’

प्रशान्त गुरूङ, कान्छा छोरा

(तुलसीकुमार गुरुङद्वारा लिखित ‘तुलसी’ पुस्तकमा लेखकका कान्छा छोरा प्रशान्त गुरुङले ब्यक्त गरेको भावनाको अंश, पुस्तक जेठ १४ गते काठमाडौंमा लोकार्पण हुँदैछ ।)

यो पनि…
समाज र शिक्षामा लगाव
प्रेरक अनि उत्प्रेरक