यस्ता हुन्छन् पिनासका लक्षण, कसरी बच्ने ?

मानिसको टाउको र अनुहारमा खोक्रो हड्डीहरु हुन्छन् । ती हड्डीहरुमा सामान्यतया हावा भरिएको हुन्छ । कुनै कारणवस त्यसमा पानी, पीप र मासु भरियो भने त्यसलाई पिनास भनिन्छ । यसका कारण, लक्षण र बच्ने उपायका बारेमा नाक, कान, घाँटी रोग विशेषज्ञ डा. अरुण अधिकारीको सुझाव यस्तो छ :

पिनास हुनुको कारण

यसको कारण साइनसहरुको भित्री मार्गमा केही गरी रोकावट आउनु अर्थात हावाको राम्रोसँग आवतजावत हुन नपाउनु हो । साथै, साइनस भित्रका फोहोर बाहिर आउन नसक्नु हो । साइनसका मुखहरु बन्द हुनुमा एलर्जी र संक्रमणलाई प्रमुख कारक मानिन्छ । कहिलेकहीँ नाकको भित्री भागमा मासु पलाउनाले पनि साइनसका मुखहरु बन्द भइ पिनास गराउनमा मुख्य भूमिका खेलिरहेको हुन्छ । चुरोटको धँुवाले र वायु प्रदुषणको कारणले पनि पिनास हुनसक्छ । पिनास मुख्य गरी दुई प्रकारको हुन्छ एक्विट पिनास र क्रोनिक पिनास । ३ महिना भन्दा कम पिनासको समस्या भयो भने त्यसलाई एक्विट भनिन्छ । ३ महिना भन्दा बढि यो समस्या भएमा त्यसलाई क्रोनिक पिनास भनिन्छ ।

पिनासका लक्षणहरु

– नाक बन्द हुने
– नाकबाट बाक्लो पहेलो सिँगान बग्ने
– टाउको भारी हुने अघिल्लो भाग निधारमा दुखिरहने
– अनुहार दुख्ने
– सुघ्ने क्षमता कम हुने
– निहुँरिदा आँखा दुख्ने
– दाँत दुख्ने

कसरी जोगिने ?

– प्रशस्त पानी पिउने
– सामान्य दुखाई छ भने सिटामोल सेवन गर्ने
– रुघा लागे तातोपानीको बाफ लिने
– धूलो–धूवाँबाट जोगिने
– साधारण रुघाखोकी भनेर लापरवाही नगर्ने
– एलर्जी हुने खालका खानेकुरा नखाने
– एलर्जीको उपचार गराउने
– नाकभित्र मासु सुन्निएको, पलाएको, हड्डी बाङ्गिएको स्थितिमा विशेषज्ञको परामर्शअनुसार शल्यक्रिया गर्ने

यो पनि पढ्नुहोस्
यी हुन् अल्सर हुनुका कारण, कसरी बच्ने ?
आँखामा देखिने समस्याबाट कसरी बच्ने ?
यी हुन् नियमित घ्युकुमारी प्रयोग गर्नुका फाइदा