एमसीसीबारे सत्तापक्षमा कित्ताकाट
सत्तारुढ गठबन्धनका शीर्ष नेताहरूबीच मंगलबार प्रधानन्यायाधीश जबरा र एमसीसीको विषयमा वार्ता भएको छ । प्रधानमन्त्री तथा कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड र नेकपा (एकीकृत समाजवादी)का अध्यक्ष माधवकुमार नेपालबीच मंगलबार बिहान छलफल भएको हो ।
प्रधानमन्त्रीको सरकारी निवास बालुवाटारमा तीन शीर्ष नेताबीच प्रधानन्यायाधीश चोलेन्द्र शमशेर जबराविरुद्ध दर्ता भएको महाअभियोग प्रस्तावपछिको विकसित राजनीतिक घटनाक्रमबारे छलफल भएको प्रचण्डका प्रेस संयोजक सूर्य किरण शर्माले जानकारी दिए ।
बैठकमा अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सदनमा टेबुल गर्ने नगर्ने विषयमा पनि छलफल भएको छ ।
महाभियोग र एमसीसीले नेपाली राजनीतिमा उत्पन्न तरङ्गकै बीच सभामुख अग्निप्रसाद सापकोटाले सोमबार बोलाएको सर्वदलीय बैठकमा एमसीसी र संसद् सुचारु गर्ने जस्ता राष्ट्रिय महत्त्वका विषयमा सहमति जुट्ने अपेक्षा गरिएको थियो । तर, सत्तापक्षमै यी विषयमा फरक–फरक दृष्टिकोण आउँदा कित्ताकाटको जस्तै अवस्था उत्पन्न हुन पुग्यो ।
संसद् सुचारु गर्ने र नियमित काम कारबाही अघि बढाउने उद्देश्यले सभामुख सापकोटाले बोलाएको सोमबारको सर्वदलीय बैठकमा सत्तापक्षकै नेताहरू एमसीसीको विषयलाई लिएर कित्ताकाटको अवस्थामा पुगेका हुन् ।
एमसीसी जसरी पनि संसद्मा टेबल गर्नुपर्ने प्रधानमन्त्री समेत रहेका काँग्रेस सभापति शेरबहादुर देउवा र राष्ट्रिय सहमतिबिना अघि बढाउन नहुने अन्य नेताको अडानका कारण सर्वदलीय बैठकमा ठोस सहमति जुट्न नसकेको बैठकमा सहभागी नेपाल मजदुर किसान पार्टीका नेता प्रेम सुवालको भनाइ छ ।
यो पनि…
एमाले मेलामा खड्गप्रसादले देखाएको चटक
सम्पादकीय : हामी कस्तो न्यायालय चाहन्छौं ?
