राइज मिडियाकर्मी निमा ल्हामु शेर्पाद्वारा सगरमाथाको सफल आरोहण
राइज मिडियाकर्मी निमा ल्हामु शेर्पाले २० वर्षको उमेरमा सगरमाथा आरोहण गरेकी छन् । उनले बुधवार बिहान ७ बजे सगरमाथाको सफल आरोहण गरेको सम्पर्क अधिकृत ज्ञानेन्द्र श्रेष्ठले जानकारी दिए ।
योसँगै एकै परिवारबाट सबैभन्दा धेरै सदस्यले सगरमाथा आरोहण गरेको विश्वरेकर्ड समेत कायम भएको सगरमाथा आरोही कान्छीमाया तामाङले जनाईन् । उनी निमाकी भाउज्यु हुन् । निमा कम उमेर (२४) वर्षमा धेरैपटक सगरमाथा चढ्ने कीर्तिमान बनाएका फुर्वा तेन्जिङ शेर्पाकी बहिनी समेत हुन् ।
मिस टिन शेर्पा २०१९ की पब्लिक च्वाइस अवार्ड विजेतासमेत रहेकी निमाले यसअघि सगरमाथा चढ्ने तयारी स्वरुप लोबुचे हिमालको आरोहण गरेकी थिइन् ।
सगरमाथाको पहिलो आरोहण विश्व कीर्तिमानी पर्वतारोही आङरिता शेर्पा (हिउँचितुवा) लाई समर्पण गरेको उनले बताएकी छन् ।
निमालाई सगरमाथाको चुचुरोमा पुर्याउने टीमको नेतृत्व उनका सहोदर दाई पर्वतारोही पेम्बा दोर्जे शेर्पाले गरेका थिए । पेम्बाले योसहित २१ पटक सगरमाथाको आरोहण गरिसकेका छन् ।
