सलमानसँग काम गरेकी यी अभिनेत्रीको जीवनका सुख-दुःख
सन् १९९५ मा सलमान खान र अतुल अग्निहोत्रीसँग फिल्म ‘वीरगती’ मा देखिएकी अभिनेत्री पूजा डडवालले निकै उतार-चढाव भोगेकी छिन् ।
बिरामी भएपछि उनका श्रीमान र परिवारका सदस्यले पनि उनलाई एक्लै छोडेका थिए । उचित उपचार नहुँदा उनको अवस्था यति बिग्रियो कि उनको तौल मात्रै २३ किलो घट्यो ।
मार्च २०१८ मा मुम्बईको शिवडी अस्पतालको जनरल वार्डमा उपचार गरिरहेकी पूजाको भिडियो भाइरल भएको थियो । त्यसपछि सलमानको बिइङ ह्युमन फाउन्डेसनले १० महिनासम्म पूजाको उपचारको जिम्मा लियो ।
निको भएपछि पुजा ७ अगस्टमा डिस्चार्ज भइन् । वीरगती बाहेक पूजाले ‘दबदबा’, ‘हिन्दुस्तान’, ‘सिन्दूर की सौगन्ध’ र ‘म्याडम नम्बर १’ जस्ता फिल्ममा काम गरिसकेकी छिन् ।
टिफिन सेवा सुरु
जीविकोपार्जनका लागि पूजाले टिफिन सेवा सुरु गरिन् । एक अन्तर्वार्तामा उनले भनेकी थिइन्, ‘मलाई के गर्ने भन्ने थाहा थिएन । त्यसपछि मेरो साथी राजेन्द्र सिंह (फिल्म निर्देशक) ले टिफिन सेवाको आइडिया दिनुभयो । उहाँले मलाई यसका लागि ठाउँ र सामग्री पनि दिनुभएको छ । अहिले म जहाँ काम गर्छु त्यही ठाउँमा बस्छु, बलिउडमा पनि काम पाउँछु भन्ने विश्वास छ ।’
फिल्ममा कमब्याक
निको भएपछि पूजाको फिल्ममा कमब्याक गर्ने सपना पनि पूरा हुन लागेको छ । उनले छोटो हिन्दी फिल्म ‘शुक्राना गुरुनानक देव जी का’ बाट कमब्याक गर्ने मौका पाएकी छिन् । चलचित्रको छायांकन भैरहेको छ । ‘शुक्राना…’ पछि पूजाले ‘ए ब्युटिफुल वाइफ’ नामको अर्को फिल्म गर्नेछिन् ।
