भारतको ७३औं गणतन्त्र दिवसमा ‘आजादीका अमृत महोत्सव’
भारतले ७३औं गणतन्त्र दिवस मनाएको छ । यसै अवसरमा काठमाडौंस्थित भारतीय राजदूतावासले आज (बुधबार) ७३औं गणतन्त्र दिवस मनाएको छ । नेपालका लागि भारतीय राजदूत विनय मोहन क्वात्राले भारतको राष्ट्रिय झण्डा झण्डोत्तोलन गरेर कार्यक्रमको उद्घाटन गरेका थिए ।
लगत्तै उनले कार्यक्रममा भारतका राष्ट्रपतिको सन्देश पढेर सुनाएका थिए । भारतीय राजदूत क्वात्राले वीर नारी र मृतक सैनिकका निकटतम नातेदारलाई ६.३५ करोड रुपियाँ नगद तथा कम्बल वितरण गरी सम्मान गरे ।
मानवीय प्रयासका सबै क्षेत्रहरुमा भारतीयले हासिल गरेका उल्लेखनीय उपलब्धिको र भारतको स्वतन्त्रताको ७५ वर्षको उत्सव मनाउन भारत सरकारले अघि सारेकोे ‘आजादीका अमृत महोत्सव’ पहलकदमीकै एक हिस्साको रूपमा यो कार्यक्रमको आयोजना गरिएको हो ।
आजादीका अमृत महोत्सवअन्तर्गत वर्षैभरि र सन् २०२३ को अगस्ट महिनासम्म थुप्रै कार्यक्रमहरुको आयोजना गरिनेछन् । नेपालमा (India@75) माइलस्टोन मनाउनका लागि नेपालका प्रदेश तथा जिल्लामा भारतको सहयोगमा कार्यान्वयन भएका ७५ वटा विकास परियोजनाहरु यसै वर्ष उद्घाटन गर्ने योजना रहेको छ ।
नेपालभरिका विभिन्न संस्था तथा स्थानीय निकायलाई दूतावासले ७५ वटा एम्बुलेन्स र स्कुल बस उपहारस्वरूप प्रदान गर्नेछ । दूतावासका सामाजिक सञ्जाल ह्याण्डलहरूमार्फत उक्त कार्यक्रम लाइभ प्रसारण गरिएको थियो ।
यो पनि
राष्ट्रियसभा निर्वाचन : मतदान जारी
यसरी सुरु भएको थियो, प्रियंका गान्धी र रबर्ट वाड्राको प्रेमकहानी
