विनोद र राज गुरुङ वी विल राइज फाउण्डेसनको बोर्ड निर्देशक नियुक्त

वी विल राइज फाउण्डेसन (We Will Rise Foundation–WWRF) ले विनोद गुरुङ र राज गुरुङलाई नयाँ बोर्ड निर्देशकको रूपमा नियुक्त गरेको छ।

हङकङलाई आधार बनाएर सामाजिक गतिविधिहरू विस्तार र सुदृढ गर्ने उद्देश्यसहित विनोद र राजलाई बोर्डमा समावेश गरिएको फाउण्डेसनले जनाएको छ। हङकङस्थित व्यवसायी दुबै सामाजिक अभियानमा लामो समयदेखि सक्रिय रहँदै आएका छन्। विनोद हङकङमा क्रियाशील सामाजिक संस्था सिद्धार्थ परिवारका अध्यक्ष समेत हुन्।

फाउण्डेसनका संस्थापक अध्यक्ष तुलसी गुरुङले सोमबार दुईलाई हङकङमा आयोजित एक समारोहबीच नियुक्ति पत्र हस्तान्तरण गरेका हुन्। उक्त कार्यक्रममा बोर्डका निर्देशक निर्मल श्रेष्ठ र सुरज गुरुङसहित हङकङस्थित पत्रकारहरूको उपस्थिति रहेको थियो।

फाउण्डेसनका अनुसार विनोद र राजको उद्यमशीलता, व्यावसायिक अनुभव तथा नेपाल र हङकङ दुवै स्थानमा सामाजिक सक्रियताप्रतिको प्रतिबद्धताले वी विल राइजको दृष्टिकोण र अभियानलाई थप मजबुत बनाउने विश्वास लिइएको छ।

नयाँ बोर्ड निर्देशकको रूपमा नियुक्त राजले गत वर्ष विश्वकै सर्वोच्च शिखर सगरमाथाको सफल आरोहण गरेका थिए। उनको यो उपलब्धिलाई साहस, अनुशासन र नेतृत्व क्षमताको प्रतीकका रूपमा हेरिएको फाउण्डेसनले जनाएको छ।

भूकम्पपछि स्थापित वी विल राइज फाउण्डेसन विभिन्न सामाजिक कार्यमा सक्रिय रहँदै आएको छ।