आइसोलेसनमा बस्दा के गर्ने के नगर्ने ?
कोरोना संक्रमण तीव्ररूपमा फैलिरहेको छ । दैनिक १० देखि १२ हजारको हाराहारीमा संक्रमितहरू बढिरहेको समयमा अस्पतालमा भन्दा होम आइसोलेसनमा बस्ने संक्रमितहरूको संख्या अहिले एकदमै धेरै छ । त्यसैले होम आइसोलेसनमा बस्दा निम्न कुराहरूमा ध्यान दिनुपर्छ ः
– आइसोलेसन अवधिभरी घर बाहिर ननिस्कने र आवश्यक सामग्री परिवार छरछिमेकीलाई व्यवस्थापन गर्न अनुरोध गर्ने । घरभित्र संक्रमित व्यक्तिले हिँडडुल कम गर्ने ।
– घरका अन्य व्यक्तिहरू बस्ने कोठामा आवत जावत नगर्ने, यदि सम्भव नभएमा अनिवार्यरूपमा मास्कको प्रयोग गरी कम्तिमा दुई मिटरको भौतिक दूरी कायम गर्ने ।
– स्तनपान गराइरहेका आमा भएको अवस्थामा आमाको दूधबाट कोभिड १९ सर्ने सम्भावना न्यून रहेको तथा स्तनपान बालबालिकाको लागि अमृत समान भएकोले सावधानी पूर्वक नियमितरूपमा स्तनपान गराउने ।
– स्तनपान गराउँदा अनिवार्यरूपमा मेडिकल मास्क उचित तरिकाले प्रयोग गर्ने साथै बच्चालाई छुनुअघि र पछि अनिवार्यरूपमा साबुनपानीले हात धुने वा स्यानीटाइजरको प्रयोग गरी हात सफा गर्ने तथा जनस्वास्थ्यका अन्य मापदण्डहरू पालना गर्ने ।
– बिरामीको हेरचाह सम्भव भएसम्म दीर्घ रोग नभएको कुनै एकै व्यक्तिले गर्ने । बिरामी पूर्णरूपमा निको नहुन्जेल वा आइसोलेसनबाट नछुटेसम्म घरमा बाहिरका मानिसलाई आउन नदिने ।
– सम्भव भएसम्म घरमा एसी वा पङ्खा प्रयोग नगर्ने, गर्नैपर्ने अवस्थामा झ्याल ढोका खुल्ला राख्ने ।
– बिरामीले अनिवार्य रूपमा मेडिकल मास्कको प्रयोग गर्ने साथै दैनिकरूपमा नयाँ मास्क परिवर्तन गर्ने, यदि मास्क सिँगान, थुक, खकारले भिज्यो, फोहोर भयो वा च्यातियो भने तत्काल मास्क परिवर्तन गर्ने र सुरक्षित तरिकाले विसर्जन गर्ने ।
– बिरामीको हेरचाह गर्ने व्यक्तिले पनि बिरामी बसेको कोठामा जानुपर्दा अनिवार्य रूपमा उचित तरिकाले मेडिकल मास्कको प्रयोग गर्ने र प्रयोग गरेको मास्कलाई सुरक्षित तरिकाले विसर्जन गर्ने सार्थ मास्क लगाउनुअघि र पछि अनिवार्य हात धुने ।
– होम आइसोलेसन बसेको घरबाट सामान लिन वा अन्य अनावश्यक काम परेमा एक जना मात्रै बाहिर जाने, बिरामीको प्रत्यक्ष स्याहार गर्ने व्यक्ति नजाने ।
– बिरामीले प्रयोग गरेका भाँडाहरू सुरक्षित तरिकाले सम्भव भएसम्म बिरामी आफैँले सफा गर्ने र राम्रोसँग सुकेपछि मात्रै पुन प्रयोग गर्ने ।
– स्नान घर वा शौचालयको प्रत्येक प्रयोग पछि डिटरजेन्ट डिस्इन्फेक्टेन्टले राम्रोसँग सफा गर्ने ।
– बिरामीले प्रयोग गर्ने ब्रस, मञ्जन, रुमाल, साबुन तथा विभिन्न व्यक्तिगत सर सफाइका सामानहरू छुट्टै राख्ने र अरूलाई प्रयोग गर्न नदिने ।
– संक्रमित व्यक्तिले प्रयोग गरेको कपडा सकेसम्म आफैँले धुने । बालबालिका तथा अशक्तको हकमा हेरचाह गर्ने व्यक्तिले मास्क पञ्जा लगाएर मात्र कपडा धुने
– नियमितरूपमा व्यायाम वा योग गर्ने ।
यो पनि…
बुस्टर डोजबारे भ्रम र यथार्थ !
नेपालमा एकैदिन १० हजार बढीमा संक्रमण पुष्टि, ५६२ जना निको
