नेपालमा एकैदिन १० हजार बढीमा संक्रमण पुष्टि, ५६२ जना निको
नेपालमा थप १० हजार २ सय ५८ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घन्टामा २२ हजार ८ सय २८ नमुना परीक्षण गर्दा यो संख्यामा संक्रमण पुष्टि भएको हो । यो सँगै नेपालमा सक्रिय संक्रमितको संख्या ३९ हजार ४४ पुगेको छ ।
पछिल्लो २४ घन्टामा थप ५ सय ६२ जना संक्रमणमुक्त भएका छन् भने एक जनाको मृत्यु भएको छ ।
देशभरका संक्रमित मध्ये काठमाडौं उपत्यकामा मात्रै ५ हजार ५ सय ४९ जना संक्रमित थपिएका छन् । जसमा काठमाडौंमा ४ हजार ४ जना, भक्तपुर ५ सय ७० र ललितपुरमा ९ सय ७५ जना थपिएका हुन् ।
नेपालका सक्रिय संक्रमितमध्ये ३७ हजार ८ सय २६ जना होम आइसोलेसनमा र १ हजार २ सय १८ जना संस्थागत आइसोलेसनमा रहेको मन्त्रालयले जनाएको छ । साथै, १ सय ५१ जना संक्रमित आइसियु र २८ जनाको भेन्टिलेटरमा उपचार भइरहेको मन्त्रालयले जनाएको छ ।
