मेराकी रिट्रिटमा प्राकृतिक उपचार देखि अर्गानिक खाना

काठमाडौंको कोलाहालयुक्त वातावरणबाट एकैछिन् भए पनि मुक्ति पाउने हो भने अब धेरै टाढा जानु पर्दैन । काठमाडौंको महाराजगन्जबाट साढे ७ किलोमिटर उत्तरमा अवस्थित मेराकी वेलनेस रिट्रिटमा प्राकृतिक उपचारदेखि अर्गानिक परिकारको समेत स्वाद चाख्न पाइन्छ ।

काठमाडौंको बूढानीलकण्ठ ठूलोगाँउस्थित मेराकी स्ट्रिट १४ रोपनी क्षेत्रफलमा फैलिएको छ । निकै शान्त वातावरणयुक्त मेराकी जंगलको फेदमा छ जहाँ सहरी आधुनिकता, भीडभाड र प्रदूषण छैन । चौधरी ग्रुपको १० करोड लगानीमा संचालनमा आएको ‘मेराकी वेलनेस रिट्रिट’ मा स्वास्थ्य र व्यायमका साथै गुणस्तरीय परिकारको व्यवस्था रहेको छ । बूढानीलकण्ठ मन्दिरबाट करिब डेढ किलोमिटर कच्ची बाटो उकालो लागेपछि मेराकी पुग्न सकिन्छ जहाँबाट राजधानीको दृश्यावलोकनसमेत गर्न सकिन्छ ।

यहाँ दुईवटा पुराना शैलीको भवनलाई आधुनिक डिजाइनमा प्रयोग गरिएको छ । जसमा उच्चस्तरीय स्पा थेरापी सेन्टर, अक्सिजन सेन्टर, नुनको माध्यमबाट शरीरका विकार निकाल्ने विधिहरू रहेको छ ।

चौधरी ग्रुपले अर्गानिक फार्म हाउसका रूपमा प्रयोग गर्दै आएको हाउसलाई नै व्यवसायिक रूप दिएको हो । मेराकीमा प्राकृतिक उपचारका विभिन्न विधि अपनाइएको छ, जसअन्तर्गत हाइबरब्यारिक ओटु चेम्बर, कोलोन हाइड्रो थेरापी, साल्ट हेलोथेरापी, साउना स्टिम तथा हट कोल्ड वाटर थेरापीजस्ता सेवा उपलब्ध छन् ।

मेराकीले २५ सयदेखि १० हजारसम्मका प्याकेजमा सेवा प्रदान गरिरहेको छ । एक दिनमा १६ जना बस्न पुग्ने मेराकीमा ३० जनासम्मलाई स्पा र आधुनिक थेरापी उपलब्ध गराउन सकिन्छ ।