पर्यटन प्रवर्द्धनका लागि ‘ताप्लेजुङ–दार्चुला’ बाइक टूर गरिने
नेपालको पर्यटन प्रवर्द्धनका लागि युवा पत्रकार तथा कलाकारको टोलीले ‘ताप्लेजुङ–दार्चुला पर्यटन प्रवर्द्धन टूर’ गर्ने भएका छन् । एनटीपी मल्टिमिडिया ग्रुपको संयोजनमा पूर्वदेखि पश्चिमसम्मका मुख्य पर्यटकीय गन्तव्यहरूमा यही जेठ १० गतेदेखि २५ गतेसम्म ‘ताप्लेजुङ–दार्चुला’ बाइक टूर गर्न लागिएको हो ।
‘ताप्लेजुङ–दार्चुला पर्यटन प्रवर्द्धन टूर’ का लागि नेपाल पर्यटन बोर्ड, नेपाल एसोसिएसन अफ टूर एन्ड ट्राभल एजेन्ट्स (नाट्टा), होटेल एसोसिएसन अफ नेपाल (हान) र नेपाल उद्योग वाणिज्य महासंघ (एफएनसीसीआई)ले समेत सहकार्य गरेको नेपाल टुरिजम प्रमोसन टूरको संयोजक विष्णु विवेकले जानकारी दिए । उनका अनुसार पाँच वटा बाइकमा १० जनको समूहले यात्रा गर्नेछन् ।
नेपालको पर्यटन प्रवर्द्धनमा तीन तहका सरकार र निजी क्षेत्रको भूमिका, पर्यटनमा जलवायु परिवर्तनको असर, दिगो पर्यटनका चुनौती’ लगायतका विषयमा ‘प्यानल डिस्कसन’ हुनेछ ।
काठमाडौँदेखि सुरु हुने टूरमा देशका मुख्य सहरहरूमा प्यानल डिस्कसन गरिने संयोजक विष्णुले बताए । ‘काठमाडौँदेखि मध्य पहाडी लोक मार्ग भएर सिन्धुली, खोटाङ, भोजपुर हुँदै ताप्लेजुङ पुग्ने र ताप्लेजुङदेखि मेची राजमार्ग हुँदै झापा पुग्ने योजना छ । झापादेखि महेन्द्र राजमार्ग हुँदै कञ्चनपुर र कञ्चनपुरदेखि अत्तरिया हुँदै डडेलधुरा भएर दार्चुला पुग्ने लक्ष्य छ । दार्चुलाबाट मध्य पहाडी लोक मार्ग भएर डोटी, अछाम, कालिकोट, दैलेख भएर सुर्खेत सदरमुकाम वीरेन्द्रनगर झर्ने योजना छ । सुर्खेतदेखि फेरि मध्य पहाडी हुँदै सल्यान, जाजरकोट, रुकुम पश्चिम, रुकुम पूर्व, बागलुङ हुँदै पोखरा भएर जेठ २५ गतेसम्म काठमाडौँ फर्किने कार्यक्रम छ ।’ उनी भन्छन्, ‘ताप्लेजुङ–दार्चुला टूर अन्तर्गत सात प्रदेशका मुख्य सहर तथा पर्यटकीय क्षेत्र विराटनगर, जनकपुर, चितवन, लुम्बिनी, नेपालगञ्ज, कर्णाली चिसापानी, धनगढी र महेन्द्रनगरमा ‘नेपालको पर्यटन प्रवर्द्धनमा तीन तहका सरकार र निजी क्षेत्रको भूमिका, पर्यटनमा जलवायु परिवर्तनको असर, दिगो पर्यटनका चुनौती’ लगायतका विषयमा ‘प्यानल डिस्कसन’ हुनेछ ।’
एनटीपी मल्टिमिडिया ग्रुप र नेपाल टुरिजम फेस्टिभलको संयोजनमा हुन लागेको ‘ताप्लेजुङ–दार्चुला बाइक टूर’ अन्तर्गत सात प्रदेशका एक सय पर्यटकीय गन्तव्य तथा एक हजार सरोकारवालासँग प्रत्यक्ष संवाद गर्ने टूर कार्यक्रमको उद्देश्य रहेको उनले बताए । युवा पत्रकार तथा कलाकारको यो टोलीको बाइक टूरले नेपालको पर्यटन प्रवर्द्धनमा टेवा दिनुका साथै सातै प्रदेशको पर्यटन प्रवर्द्धनमा सरोकारवालाहरूको भूमिकालाई थप सशक्त बनाउने आयोजकको विश्वास छ । २०८० सालदेखि २०९० सालसम्मलाई पर्यटन भ्रमण दशक बनाउने सरकारको महत्त्वाकाङ्क्षी लक्ष्यलाई समेत साथ दिन गर्न लागिएको यो टूरले पर्यटन प्रवर्द्धनका चुनौती र सम्भावनाबारे थप बृहत् छलफल तथा बहसको सुरुवात गर्दै नेपालमा धेरैभन्दा धेरै पर्यटक भित्र्याउन गर्नुपर्ने काम तथा नयाँ कार्यक्रम ल्याउन पनि मद्दत गर्ने आयोजकले बताएको छ ।
यो पनि…
‘मेरो गाउँ, मेरो ठाउँ’ भिडियो च्यालेन्जको मनोनयन सार्वजनिक
भिडियो च्यालेन्ज अभियानमा लब्ध प्रतिष्ठित व्यक्तित्वहरूको सहभागिता
वि विल राइज फाउन्डेसन र नेपाल टेलिभिजनबीच सम्झौता
