सिन्धुली पुग्यो बृक्षारोपण महाअभियान
‘दश लाख बृक्षारोपण तथा संरक्षण महाअभियान’ अन्तर्गत शनिवार सिन्धुली जिल्लाको सुनकोशी गाँउपालिका वडा नं ६ खाल्टेमा बृक्षारोपण कार्यक्रम सम्पन्न भएको छ ।
लुम्बिनी विश्व शान्ति मञ्चको दश लाख बृक्षारोपण तथा संरक्षण महाअभियानका क्रममा ग्रीन ह्यान्ड्सको आयोजना र वार्मिङ हर्ट्स नेपालको समन्वयमा वीपी राजमार्गको मुलकोट नजिकै उक्त स्थानमा २०० वटा तेजपत्ता, कपुर र टांकीको बिरुवा रोप्ने कार्यक्रम सम्पन्न भएको हो । उक्त कार्यक्रमको संयोजन स्थानीय काबलेटी वन उपभोक्ता समितिका अध्यक्ष दामोदर उप्रेतीले गरेका थिए । त्यसै गरी वार्मिङ हर्ट्स नेपालका तर्फबाट अनामिका अर्याल र सरोज भण्डारी, ग्रीन ह्यान्ड्सका तर्फबाट अर्पणा पोख्रेल लगायतले बिभिन्न प्रजातीका बिरुवाहरु रोपेका थिए । लुम्बिनी विश्व शान्ति मञ्चका अध्यक्ष बासु गौतमका अनुसार गत जुन ०५ (जेठ २२) विश्व वातावरण दिवस यता मात्र मञ्चको संयोजन र नेपाली सेनाको सहकार्यमा काठमाडौंको चन्द्रागिरी, काभ्रेपलाञ्चोकको पनौती, रुपन्देहीको बुटवल र तिलोत्तमा, काठमाडौंको गोकर्णेश्वरमा बृक्षारोपण कार्यक्रम सम्पन्न भइसकेको छ ।
अध्यक्ष गौतमका अनुसार बृक्षारोपण गरिएका स्थानहरुमा स्थानिय रोटरी क्लब, लायन्स क्लब, जेसिज, आमा समुह, स्थानीय क्लब, मन्दिर व्यवस्थापन समिती, टोल समिती, विभिन्न सामाजिक संघ–संस्थाहरुले संरक्षणको जिम्मा लिएका छन् ।
आगामी साउन २० देखी २५ गतेसम्म लुम्बिनी प्रदेशको नेपालगन्ज, लुम्बिनी, भैरहवा, पाल्पा लगायत स्थानहरुमा १५ सय बिरुवा रोप्ने कार्यक्रम रहेको र साउन २१ गते (अगस्ट ०६ तारिख) हिरोशिमा दिवसका अवसरमा बुद्ध जन्मस्थल लुम्बिनीमा हिरोशिमा नगरको अधिकारिक बृक्ष कपुर र भैरहवामा हिरोशिमा सिटीको अधिकारिक फुल कनेर (ओलियन्डर) को १०८ विरुवा लगाउने कार्यक्रम रहेको मञ्चका अध्यक्ष गौतमले बताए ।
मञ्चका महासचिव धिरेन्द्र पन्तका अनुसार बृक्षारोपणको आगामी कार्यक्रममा स्थानीय तह, बैंक तथा वित्तीय संस्था र विमा कम्पनीहरूसंग हातेमालो गरी बित्तिय साक्षरता तथा हरित अर्थतन्त्रका बिषयमा प्रशिक्षण गोष्ठी पनि संचालन हुनेछ ।
दश लाख बृक्षारोपण तथा संरक्षण महाअभियानमा राइज मिडिया नेटवर्क मिडिया पार्टनर रहेको छ ।
यो पनि…
बुटवलमा ‘दश लाख बृक्षारोपण तथा संरक्षण महाअभियान’
पनौतीमा वृक्षारोपण
