के तपाई स्लिम देखिन चाहनु हुन्छ ? यस्तो ड्रेस लगाउनुस्

चिटिक्क देखिन कसलाई मन नपर्दो हो ! आफ्नो व्यक्तित्व आकर्षित देखाउन मान्छेले अनेक उपाय अपनाउँछन् । राम्रो ड्रेसअपले मान्छेको व्यक्तित्व झल्काउँछ । आत्मबल बढाउँछ ।

ड्रेसको डिजाइन, कलर लगायतका विषयमा कतिपयले आफ्ना साथीभाइहरूसँग सल्लाह लिने गरेका हुन्छन् । तर ड्रेस छनोट गर्ने मामलामा अधिकांशलाई समस्या परेको देखिन्छ । चर्चित फेसन डिजाइनर रोजिना श्रेष्ठले शरीर मोटोपन भएका महिला र पुरुषका लागि यस्तो पहिरन सुझाएकी छन्।

मोटोपन भएका महिलाले यसरी ड्रेस लगाउनुस् ।

–कुनै पनि ड्रेस लगाउँदा सकेसम्म स्लिपलेस नलगाउने ।
–कुर्ता लगाउँदा कुर्ता छोटो नलगाउने । छोटो कुर्तामा मोटोपन देखिन्छ ।
–सकेसम्म डार्क कलर प्रयोग गर्ने । त्यो पनि धेरै ठूलो बुट्टा भएको नलगाउने ।
–नाइट पार्टीमा सारी, गाऊन र लेहङ्गा लगाउँदा सकेसम्म डार्क कलर छान्ने ।
–सकेसम्म सादा कपडामा हल्का वर्क गराउने । वोर्कर राख्दा पनि अलि सानो इन्च राखेर ड्रेस बनाउनु पर्दछ ।
–कपडामा जर्जेट/सिफन/सफ्ट नेट क्रेपहरूमा ड्रेस बनाउनुपर्छ ।
–नाइट पार्टीमा जाँदा सकेसम्म धेरै कलरफुल ड्रेस नलगाउने । सकेसम्म माथिदेखि तलसम्म एउटै कलर प्रयोग गर्नुपर्दछ ।
–क्याजुअल ड्रेस लगाउँदा होस् या पार्टी ड्रेस धेरै फिटिङ पनि नलगाउने अनि धेरै लुज पनि लगाउनु हँुदैन । शरीरलाई ठिक्का हुने ड्रेस लगाउनु पर्छ ।

मोटोपन भएका पुरुषले यसरी ड्रेस लगाउनुस् ।

–टि–शर्ट किन्दा ओभर साइज पनि नलिने, धेरै फिटिङ पनि नलिने ।
–डार्क कलरको शर्ट, टि–शर्ट र पाइन्टहरू प्रयोग गर्ने ।
–नेक एरिया पुरै कभर गर्ने टि–शर्ट नलगाउने ।
–टि–शर्ट भित्र, शर्ट माथि लगाउने ।
–फर्मल पार्टीमा जानु छ भने टि–शर्ट या शर्टको माथि ब्लेजर लगाउने ।
–ठूल्ठूलो चेक भएको ठूलो–ठूलो प्यर्टन भएको शर्ट वा टि–शर्ट नलगाउने ।
–धेरै फिटिङ पाइन्ट वा ट्राउजर पनि नलगाउने । धेरै फिटिङ्ले दुब्लो देखाउँछ भन्ने भ्रम हो । ठिक्क लुज फिटिङ लगाउने ।