आरआरआर व्यापार : ओपनिङमै रेकर्ड
शुक्रबारबाट मुलुकका एक सय ५० हलमा रिलिज भएको फिल्म ‘आरआरआर’ ले काठमाडौं र मोफसलमा पोखरा, नारायणगढ, बुटवल र नेपालगञ्जजस्ता ठूला सहरमा आक्रामक ओपनिङ गरेको छ ।
शनिबारको कलेक्सन पहिलो दिनको भन्दा उच्च छ । आइतबार पनि मुख्य मल्टिप्लेक्समा कलेक्सन स्थिर देखिएको छ ।
आइतबार बेलुकासम्म क्यूएफएक्ससहितका मुलुकका ठूला मल्टिप्लेक्समा आरआरआरको टिकट अग्रिम बिक्री भइसकेको छ । वितरण स्रोतका अनुसार नेपालमा रामचरण र जुनियर एनटीआर स्टारर फिल्मले दुई दिनमा झण्डै २ करोड ५० लाख रुपैयाँभन्दा बढी ग्रस कमाइ गरेको छ ।
आरआरआरको कलेक्सनलाई कोरोना महामारी सुरु भएयताकै सर्वाधिक ओपनिङ मान्न सकिन्छ । यसले एप्पल इन्टरटेनमेन्टको ‘स्पाइडरम्यान: नो वे होम’को ओपनिङलाई पनि उछिनेको छ । स्पाइडरम्यान मल्टिप्लेक्समा केन्द्रित थियो भने आरआरआर सिंगल स्क्रिनमा पनि आक्रामक छ ।
