विश्व इतिहासमा आज : यी हुन् मुख्य चार घटना

आज २६ मार्च । विश्व इतिहासमा विभिन्न राजनीतिक तथा सामाजिक घटनाहरू भए । प्रस्तुत छ केही मुख्य घटना :

रूसमा पुटिन राष्ट्रपति
सन् २००० मा भ्लादिमिर पुटिन रूसको राष्ट्रपतिमा निर्वाचित भएका थिए । भूतपूर्व केजीबी अधिकारी पुटिनले रूसलाई १९९० को आर्थिक संकटबाट मुक्त गरेकोमा सुरुवाती समयमा उनको प्रशंसा गरिएको थियो ।

रूसमा लामो समयदेखि एकछत्र शासन कायम गरेका पुटिनको पछिल्लो समयमा युक्रेनमाथि रूसी हमला गर्ने निर्णयका कारण अन्तर्राष्ट्रिय समुदायले चर्को आलोचना गरेको छ । रूसले २४ फेब्रुवरीदेखि युक्रेनमाथि हमला गरिरहेको छ ।

मर्कोसर समूह स्थापना
सन् १९९१ मा चार ओटा दक्षिण अमेरिकी देशहरूले मर्कोसर समूह स्थापना गरेका थिए । अर्जेन्टिना, ब्राजिल, उरुग्वे र पारग्वे समूहका संस्थापक सदस्य हुन् । साझा बजार प्रवर्द्धन गर्ने उदेश्यले समूह स्थापना गरिएको हो ।

इजरायल र इजिप्टबीच सन्धि
सन् १९७९ मा इजरायल र इजिप्टबीच शान्ति सम्झौतामा हस्ताक्षर भएको थियो । इजिप्टका राष्ट्रपति अजवर अल सदात र इजरायलका प्रधानमन्त्री मेनाचेम बिगिनले सो सन्धिमा हस्ताक्षर गरेका थिए । सम्झौतासँगै दुई देशबीचको ३० वर्ष लामो युद्ध समाप्त भएका थियो ।

जैविक हतियार सन्धि
सन् १९७५ मा जैविक हतियार सन्धि कार्यान्वयनमा आएका थियो । सन्धिले जैविक र विषाक्त हतियारको विकास, उत्पादन र भण्डारणमा प्रतिबन्ध लगाएको छ । यसलाई अहिले विश्वका अधिकांश देशहरूले अनुमोदन गरिसकेका छन् ।
यो पनि…
पश्चिमा देशहरूले युक्रेनलाई थप सहयोग गर्ने