देवेन्द्र बब्लुका फ्यान : उपहार पठाउनेदेखि जताततै नाम लेख्नेसम्म
पछिल्लो पुस्ताले एकदमै रुचाएका गायक हुन् देवेन्द्र बब्लु । उनले गाएका प्रायः सबै गीतहरू ट्रेन्डिङमा परेका छन् । युवा पुस्तामा उनको क्रेज धेरै छ । गायक प्रकाश सपूतको भाइ हुनुको साथै आफ्नो छुट्टै पहिचान बनाउन सफल छन् उनी ।
अहिलेसम्म उनले जति पनि गीत गाए, ती सबै गीतको भिडियोमा अभिनय पनि गरेका छन् । गायक, गीतकार, निर्देशक र मोडल उनी बहुप्रतिभाले पोख्त छन् । छोटो समयमा धेरै दर्शकको माया पाउन सफल उनको फ्यान फलोइङ धेरै छ । आफ्ना केही अनौठा फ्यानलाई देवेन्द्र यसरी सम्झन्छन् :
२० देखि ३० वटा नम्बर फेरेर फोन र म्यासेज गर्ने फ्यान
पाल्पाको एक जना फ्यान हुनुहुन्छ जसले मलाई लगभग २० देखि ३० वटा नम्बरबाट फोन गर्नुभयो । फरक–फरक नम्बरबाट फोन र म्यासेज गरेर उहाँले धेरै दुःख दिनुभयो । एउटा नम्बरलाई बल्क लिस्टमा हाल्यो अर्को नम्बरबाट फोन गरी हाल्ने । एकपटक लामो कुरा गरेर मैले उहाँलाई राम्ररी सम्झाएँ त्यसपछि उहाँले फोन गर्न छोड्नुभयो ।
अफिस नजिकैको क्याफेमा विभिन्न उपहार छोडेर जाने फ्यान
अनामनगर हाम्रो अफिसनजिकै एउटा क्याफे छ । त्यस क्याफेमा म बेला–बेलामा कफी पिउन जाने गर्छु । त्यस क्याफेमा एक जना फ्यानले मेरो लागि उपहार छोडेर जानुभएको रहेछ ।
क्याफेको रिसेप्सनबाट मलाई उपहार दिनुभयो तपाईंको लागि एकजनाले छोडेर जानुभएको भनेर । कसले भनेर मैले सोधेँ, उहाँहरूले नाम खुलाउन मिल्दैन भन्नुभयो । ती फ्यानले बारम्बार मेरो लागि क्याफेमा उपहार छोडेर जानुहुन्छ । कहिले गलबन्दी त कहिले फूल तर उहाँको नाम भने मलाई थाहा छैन ।
१२ घण्टा एकै ठाउँमा बसेर मेरो प्रस्तुति कुर्ने फ्यान
केही समयअघि पोखराको एउटा कार्यक्रममा प्रस्तुति दिनको लागि पोखरा पुगेको थिएँ । साँझ सात बजे मेरो प्रस्तुति थियो । म सात बजे प्रस्तुतिको पुगे त्यहाँ एक जना व्यक्ति मलाई भेट्नको लागि एक जना व्यक्ति कुरिरहनुभएको रहेछ ।
कार्यक्रम आयोजक समितिका एक जनाले ती व्यक्तिलाई चिनाउँदै भने,– ‘तपाईंको प्रस्तुतिको लागि र तपाईंलाई भेट्नको लागि बिहान ७ बजेदेखि तपाईंलाई कुरेर बस्नुभएको उहाँ ।’ मलाई भेटेर उहाँ एकदमै खुसी हुनुभयो । पोखराको ती फ्यानलाई म कहिल्यै बिर्सन्नँ ।
जताततै मेरो नाम लेखी फोटो खिचेर पठाउने फ्यान
एक जना महिला फ्यान पनि मलाई अनौठो लाग्छ । ती फ्यानले मलाई बेला–बेलामा मलाई म्यासेज गरिरहनुहुन्छ । भित्तामा, किताबमा, ढुङ्गामा र बालुवामा छुट्टाछुट्टै ठाउँमा मेरो नाम लेखेर फोटो खिचेर पठाउनु हुन्छ । फोटोसँगै तपाईं एकदमै मन पर्छ, म तपाईंको ठूलो फ्यान हो जस्ता म्यासेजहरू पनि पठाउने गर्छिन् ती फ्यानले ।
यो पनि पढ्नुहोस् :
ज्योती भन्छिन्– ‘फ्यानले ओठमा किस गर्दा बान्ता आयो’
सोनिकाका फ्यान– सुनको सिक्री गिफ्ट दिनेदेखि झम्टेर रुनेसम्म
