४ दिनमा १५४ अंकले नेप्से घट्दा कारोबार रकम ४ अर्बमा खुम्चियो
पछिल्लो समय सेयर बजार सुस्ताएको छ । साताको कारोबारको चाैथो दिनसम्म आइपुग्दासम्म नेप्से सूचक डेढ सय अंकभन्दा बढीले घटेको छ। गत चार दिनमा नेप्से सूचक १५४.७३ अंकले घटेको हो ।
बुधबार पनि नेप्से सूचक ३८.४५ अंकले घटेर २७७६.६१ विन्दुमा झरेको छ। यस दिन सेन्सेटिभ सूचक पनि ६.५६ अंकले घटेको छ।
नेप्से सूचकसँगै कारोबार रकम पनि घट्दै गएको छ। ८ अर्बमाथि पुगेको कारोबार रकम ४ अर्ब रुपैयाँमा झरेको छ। मंगलबार पाँच अर्ब माथिको शेयर कारोबार भएकोमा बुधबार ४ अर्ब ३१ करोड रुपैयाँको मात्रै शेयर कारोबार भएको छ। यस दिन ९३ लाख ५८ हजार ७०० कित्ता शेयर ४ अर्ब ३१ करोड ३१ लाख ५४ हजार ४२ रुपैयाँमा खरिद बिक्री भएको छ।
यस दिन विन लघुवित्त र बुद्धभुमि हाइड्रोपावरको शेयरमूल्य सबैभन्दा धेरै १० प्रतिशतले बढेको छ। भने सीइडिभि हाइड्रोपावर र सानिमा जनरल इन्स्योरेन्सको ४ प्रतिशत, मैलुङ्ग खोला जलविद्युत र कालिका माइक्रोफाइनान्सको १.९७ प्रतिशतले बढेको छ।
यता पोखरा फाइनान्सको शेयरमूल्य सबैभन्दा धेरै ५.५९ प्रतिशतले घटेको छ भने सेन्ट्रल फाइनान्सको ४.२८ प्रतिशत, मानुषी लघुवित्तको ४.२४ प्रतिशत, समृद्धि फाइनान्सको ३.६५ प्रतिशत, घलेम्दी हाइड्रोको ३.५० प्रतिशत र एसियन लाइफ इन्स्योरेन्सको ३.४६ प्रतिशतले घटेको छ।
बुधबार अपि पावरको सबैभन्दा धेरै १६ करोड ७७ लाख रुपैयाँ बराबरको शेयर कारोबार भएको छ भने अरुण भ्याली हाइड्रोपावरको १३ करोड ५५ लाख, अपर तामाकोशीको १० करोड ३१ लाख, जलविद्युत लगानी तथा विकास कम्पनीको ९ करोड ८६ लाख र नेपाल लाइफ इन्स्योरेन्सको ९ करोड ४० लाख रुपैयाँको शेयर कारोबार भएको छ।
यस दिन कारोबारमा आएका १३ वटै उपसमूहको सूचक नकारात्मक देखिएको छ। जसमा फाइनान्स उपसमूहको सूचक सबैभन्दा धेरै २.४२ प्रतिशतले घटेको छ।
