प्रदेश १ को नाम हिउँदे अधिवेशनबाट टुंग्याइने
काठमाडौं । ४ वर्षपछि प्रदेश २ मा मधेश प्रदेश नाम र जनकपुर राजधानीको टुंगो लागेपछि अब प्रदेश १ को नाम र राजधानी टुंग्याउन बाँकी छ। यसका लागि प्रदेश १ सरकारलाई दबाब परेको छ।
प्रदेश १ का मुख्यमन्त्री राजेन्द्रकुमार राईले प्रदेशको नामकरण प्रदेशसभाको आउँदो हिउँदे अधिवेशनबाट टुंग्याइने बताएका छन्।
मुख्यमन्त्रीको कार्यालयमा (४ माघ) मंगलबार सञ्चारकर्मीसँग कुराकानी गर्दै राईले भने, ‘प्रदेशको नाम प्रदेशसभाले नै टुंगो लगाउँछ।’
मुख्यमन्त्री राईले आफूहरू सरकारमा आएपछि सभाको एउटा पनि बैठक नबसेको सन्दर्भ उल्लेख गर्दै अब छिट्टै हिउँदे अधिवेशन आरम्भ गरेर प्रदेशको नामकरण गर्ने प्रक्रिया अगाडि बढाउने जानकारी दिए।
उनले यही माघ २० गतेभित्र हिउँदे अधिवेशन सुरु गरेर प्रदेशको नाम टुंगो लगाउनेतर्फ आवश्यक प्रक्रिया अघि बढाइने बताए।
