बोटविरुवाको हेरचाह कसरी गर्ने ?
घरलाई सुन्दर बनाउन बगैँचाको भूमिका महत्वपूर्ण हुन्छ । सदाबहार बोटविरुवाले घरलाई सुन्दर देखाउँछ । विरुवा रोपेर मात्रै हुँदैन, यसको स्याहार पनि उत्तिकै जरुरी छ । विगत डेढ दशकदेखि यो क्षेत्रमा काम गर्दै आएकी कमला पराजुलीका अनुसार बोटविरुवाको हेरचाह गर्दा निम्न पक्षमा विशेष ध्यान दिनुपर्दछ ।
— कुनै पनि नयाँ विरुवा रोप्दै हुनुन्छ भने तपाईले नर्सरीबाट ल्याउने विरुवा कम्तिमा पनि साढे दुई इञ्चको हुनुपर्दछ ।
— यदि तपाईंले घरमै गमलामा बेर्ना उमार्नु भएको छ भने एकदेखि डेढ फिटको खाडल बनाएर मात्र विरुवालाई सार्नुपर्छ ।
— गार्डेनको माटो चिम्ट्याइलो छ भने त्यसमा बालुवा, माटो र मल मिसाउनु पर्छ ।
— गमलामा भएको बेर्नालाई जमिनमा सार्दा गमलामा भएको माटोसँगै पुर्नुपर्छ ।
— विरुवा सारिसकेपछि त्यसलाई वरिपरिबाट पानी हाल्ने, विरुवा नसरेसम्म दिनको दुई पटक बिहान र बेलुका नबिराई पानी हाल्नुपर्छ ।
— विरुवालाई बेला–बेलामा गोडमेल गर्दा अनावश्यक झार उम्रिन पाउँदैन ।
— बोटविरुवामा ‘लाई’ लगायत कीरा लाग्ने समस्या हुन सक्छ, त्यसको लागि पसलबाट लाईको औषधी ल्याएर हाल्ने अथवा घरमै पनि औषधी बनाउन सकिन्छ । त्यसको लागि लसुन र तितेपातीलाई कुटेर पानीमा मिसाउने र विरुवामा छर्किदा लाई तथा अन्य कीराहरू लाग्न पाउँदैनन् ।
— बोटविरुवामा मल हाल्दा कम्पोष्ट मल, पिना र बोन मिल मिसाएर विरुवाको अवस्था हेरी एउटा विरुवालाई आधा किलोको दरले हाल्नुपर्छ । यसरी मल हालेपछि विरुवाको वृद्धि विकास छिटो हुन्छ ।
