बन्ने भयो चलचित्र ‘प्रसाद’को सिक्वेल ‘प्रसाद २’
तीन वर्ष अघि प्रशारण आएको नेपाली चलचित्र ‘प्रसाद’ को सिक्वेल ‘प्रसाद २’ बन्ने भएको छ । बिहिबार काठमाडौंमा आयोजित पत्रकार सम्मेलनमार्फत यसबारे जानकारी गराइएको हो ।
सामाजिक, पारिवारिक र प्रेमकथामा आधारित रहेको यो चलचित्रलाई निर्देशक सुदर्शन थापाले निर्देशन गर्दैछन् । उनले यो चलचित्र यसअघि प्रसारण भएको प्रसादको विशुद्ध सिक्वेल भएको बताए ।
‘यो फिल्म प्रसादको कथा जहाँबाट सकियो त्यहीँबाट सुरु हुन्छ,’ उनले भने, ‘यसपटक जातीय विभेद र छुवाछुतको कथावस्तुमात्र नभएर प्रसादका मूख्य पात्र बाबुराम र नारायणीको जीवनमा आउने सामाजिक र पारिवारिक द्वन्द्वलाई चलचित्रमा चित्रण गर्नेछौं ।’
चलचित्रमा बाबुरामको भूमिकामा अभिनेता विपिन कार्की र नारायणीको नम्रता श्रेष्ठ छन् । प्रसाद २ मा निश्चल बस्नेत भने छैनन् । उनको स्थानमा अर्पण थापा भित्रिएका छन् । सुशिल पौडेलको कथा रहेको चलचित्रलाई सुवास थापा र केशव पाण्डेले निर्माण गरेका हुन् । चलचित्रको छायाँकन छिट्टै सुरु गर्ने निर्माता टीमले जनाएको छ ।
