‘औपचारिक शिक्षाका लागि उमेरले छेक्दैन’

ताप्लेजुङस्थित कञ्चन एकेडेमीबाट २०६७ सालमा एसएलसी (एसईई) दिएँ । त्यो समयमा एसएलसीलाई ‘आइरन गेट’ भनिन्थ्यो । दोस्रो श्रेणीमा पास भए पनि धेरै खुसी थिएँ । पहिलो श्रेणीमा पास भएकाहरूको साइन्स पढ्ने क्रेज थियो ।

प्लस टुमा व्यवस्थापन संकायमा भर्ना हुने निधो गरेँ । ताप्लेजुङस्थित भानुजन माध्यमिक विद्यालय उच्च माध्यमिक विद्यालयमा भर्ना भएँ । यो उमेर र स्वभाव नै चञ्चले हुनाले पढाइ के हुनु, झुर नै थियो । पढ्न अल्छि लाग्थ्यो । कलेज गए पनि प्रायः बाहिरै घुमेर बिताउथेँ, कक्षामा कमै बस्थेँ ।

हामी आठ जना साथी एकदमैै मिल्थ्यौँ । एक जना कक्षाबाट निस्क्यो भने बाँकी सातै जना नै बाहिन्थ्यौँ । एउटा पेन र कपी मात्रै बोकेर कलेज जान्थेँ । बुक कहिल्यै किनिनँ ।

प्लस टु पढ्दै गर्दा रेडियो तमोरमा काम गर्थें । यहाँबाट मार्केटिङ पनि गर्थें । प्लस टुमा पटक–पटक फेल भएकाले फेरि फेरि परीक्षा दिन जानै लाज लाग्थ्यो । सोही कारणले परीक्षा दिइनँ । कक्षा ११ र १२ को पढाइ पूरा गर्नै सकिनँ ।

म कार्यरत रेडियोको टिमले मलाई काठमाडौं ल्यायो । रेडियो नेपालबाट प्रसारण हुने ‘धर्ती–आकाश’मा कलाकारको रूपमा मनोज गजुरेल सरसँग रेडियो कार्यक्रममा काम गरेँ ।

शिक्षाका लागि कुनै उमेर हुँदैन भन्ने मनस्थितिले औपचारिक शिक्षालाई फेरि निरन्तरता गर्ने निणर्य गरेँ । मलाई पत्रकारिता मन पर्ने विषय भएकाले सिफलस्थित ब्रिलियन्ट बहुमुखी कलेजमा भर्ना भएँ ।

पहिलो दिन कलेज जाँदा कक्षाका सबै विद्यार्थी उठेका थिएँ, सर आउनुभयो भनेर । अर्को दिन कलेज जाने नजाने दोधारमा थिएँ । तर, पढ्नका लागि आफूलाई हौसला दिएँ निरन्तर कलेज गएँ । बिहानको कक्षा लिएर दिनभरि काम र कार्यक्रममा सहभागी हुन्थेँ ।

यहाँ पढ्दा कलेजमा सांस्कृतिक कार्यक्रम कम हुन्थ्यो । तर, अरू–अरू कलेजका कार्यक्रममा सहभागी हुन्थे । यहाँबाट शैक्षिक भ्रमणका लागि सुन्दरीजल गएका थियौँ । यहाँको भ्रमण समाचार बनाउनुपर्ने थियो । रेडियोमा काम गरेको हुनाले सजिलै गरेँ ।

प्लस टुपछि पशुपति कलेजमा स्नातक तहमा पत्रकारिता विषय पढ्नका लागि एक दुई कक्षा लिएँ, तर खासै फरक पाइन । चाबहिलस्थित जिपी मेमोरियल कलेजमा मानविकी अन्तर्गतकै ग्रामीण विकास विषय लिएर भर्ना भएँ । तेस्रो वर्षको परीक्षा हुँदा कमेडी च्याम्पियनमा थिएँ । एउटा विषय सफल हुन सकेन । अहिले सोही विषयको परीक्षा दिने तयारीमा छु ।

यो पनि…
र्यापर बालेन शाह भन्छन्,–‘ इन्जिनियरिङमा युर्निभसिटी टप गरेँ’
‘होटल म्यानेजमेन्टका साथीले खाना पकाउँथे, हामी भाँडा माझ्थ्यौं’