लोक सर्जक खेम सेन्चुरीको नजरमा पढ्नैपर्ने ३ पुस्तक

लोकगायक एवं सर्जक खेम सेन्चुरी अहिले एकदमै व्यस्त कलाकारको सूचीमा पर्छन् । एकपछि अर्को हिट गीत दिन सफल सेन्चुरी अहिले पनि नयाँ गीतको तयारीमा व्यस्त छन् । आफ्नो काममा एकदमै व्यस्त उनलाई केही समय फुर्सद मिलेको खण्डमा पुस्तक पढ्न मन पर्छ । उनले पढेका थुप्रै पुस्तकहरूमध्ये उनलाई एकदमै मन परेको तीन पुस्तक यस प्रकार छ –

चिना हराएको मान्छे
वरिष्ठ हास्यकलाकार हरिवंश आचार्यद्वारा लिखित ‘चिना हराएको मान्छे’ मलाई एकदमै मन परेको पुस्तक हो । यस पुस्तकले जीवन जिउने कला सिकाउँछ । धेरै जनाको सिफारिसमा मैले यो पुस्तक पढेको थिएँ । पुस्तक पढिसकेपछि मलाई एकदमै राम्रो पुस्तक पढेछु भन्ने अनुभूति भएको थियो ।

उत्कृष्ट अभिनयले सबैको मन जित्न सफल कलाकारले आफ्नो वास्तविक जीवनमा भोगेका विभिन्न उतार चढावको कुरा चिना हराएको मान्छेमा पाइन्छ । मान्छेको जीवनमा आइपर्ने उतार चढावलाई कसरी व्यवस्थापन गर्नुपर्छ भन्ने शिक्षा यो पुस्तकबाट लिन सकिन्छ ।

समर लभ
मैले पढेको पुस्तकहरूमध्ये समर लभ पनि असाध्यै मन परेको पुस्तक हो । यस पुस्तका एउटा छुट्टै प्रेमकथा समेटिएको छ । युवा पुस्ताहरूले धेरै मन पराएको पुस्तक पनि हो समर लभ । साधारण प्रेम कथामा आधारित यस पुस्तकमा भाषा पनि निकै सरल प्रयोग भएको छ । कथामा प्रस्तुत भएका पात्रहरू पनि असाध्यै प्रिय लाग्छन् । यस पुस्तकाको केही हरफहरूले मेरो मन छोएको थियो ।

मुनामदन
महाकवि लक्ष्मीप्रसाद देवकोटाको लोकप्रिय पुस्तक मुनामदन पनि एकदमै राम्रो छ । युवा अवस्था हुँदा पढेको पुस्तक भएर होला यो पुस्तक पनि मलाई मन पर्छ । एकदमै सरल भाषा प्रयोग भएको छ । महाकवि देवकोटाले यस पुस्तकमा समेट्नुभएको विषयवस्तु हाम्रो समाजसँग मिल्छ । नेपालीहरूको भावनालाई यस पुस्तकमा समावेश गरिएको छ । यस पुस्तकको प्रेम कथा पनि एकदमै राम्रो छ ।

छुटाउनु भयो की
यस्तो थियो महाकवि लक्ष्मीप्रसाद देवकोटाको लाइफस्टाइल
कोरोनासँगै यसरी बदलियो लाइफस्टाइल