कसले गर्यो ज्ञानेन्द्र शाहीको टोलीमाथि कुटपिट ?

सामाजिक अभियन्ता ज्ञानेन्द्र शाहीको टोलिमाथि कुटपिट भएको छ । राहत बाँड्न भन्दै सुर्खेत पुगेका शाहीको टिममाथि शुक्रवार राती स्थानीय युवाहरुले कुटपिट गरेका हुन् । शाहीले भने आफू राहत बाँडेर फर्किंदै गर्दा आक्रमणमा परेको बताएका छन् । तर जिल्ला प्रहरी कार्यालय सुर्खेतका प्रमुख एसपी राजेन्द्र भट्ट भने आक्रमण नभएर कुटपिट भएको बताउँछन् ।

उनको टिममा राजेश महत, कृष्ण पाण्डे, तिलक बस्नेत, नितु खड्का, लोक बहादुर रोकाय, शान्त शर्मा, सीता आचार्य, महेश बीसी र खगेन्द्र बजगाईं लगायतको टिम रहेको थियो । घटना हिजो (शुक्रवार) राती १० बजेतिर वीरेन्द्र नगरको करेखोलामा आक्रमण भएको हो ।

के थियो कारण ?

एसपी भट्टका अनुसार लेभर काम गर्ने युवाहरुको समूह र शाहीको टीममाथि भनाभन भएपछि कुटपिट भएको हो ।

‘लेभर काम गर्ने केटाहरु थिए, उनीहरु र मोटरसाइकलमा चढेर आएका शाहीको टिममाथि सुरुमा भनाभन भएछ’, उनले भने, ‘मोटरसाइकल चढेर आएकाले हेल्मेटले हानेपछि स्थानीय केटाहरुले गाउँलेलाई बोलाए, त्यसपछि धेरै जना त भागिसेकछन्, बाँकि रहेका गाडी ड्राइभर र पाँच जनालाई गाउँलेले कुटपिट गरेछन् ।’

ज्ञानेन्द्र शाहीको टिममा पहिला १०, ११ जनाको टीम रहेको र पुलिस पुग्दा भनेँ ५ जना मात्रै रहेको एसपी भट्ट बताउँछन् । अहिले घाईतेको उपचार भइरहेको र घटनामा संलग्न ५ जनालाई अनुसन्धानका लागि राखिएको छ ।