शताब्दी पुरुष सत्यमोहन जोशीको उपचार हुँदै , भएको के हो ?
वाङ्मय शताब्दी पुरुष सत्यमोहन जोशी अस्पताल भर्ना भएका छन् । उनलाई श्वासप्रश्वासमा समस्या आएपछि जेठ २६ गते ललितपुरको किस्ट अस्पतालमा भर्ना गरिएकोउनकी छोरी देवकी श्रेष्ठले बताइन् ।
‘केही समयअघि दायाँ फोक्सोमा पानी भरिएको थियो, त्यो बेला उपचारका लागि महिनादिनसम्म अस्पताल बस्नुभयो’, उनले भनिन्, ‘अस्ति राती श्वासप्रश्वासमा समस्या आयो भन्नुभयो, अस्पतालमा फोन गर्छु भन्दा पर्दैन भन्नुभएको थियो, उहाँ फोक्सोकै समस्या फेरि आएको हो कि भनेर डराउनु भएको छ ।’
१०२ वर्षीय जोशीको उपचारका लागि छाती रोग विशेषज्ञ प्रा.डा. मीलेश जंग सिजापतिको नेतृत्वमा कार्डियोलोजिस्ट तथा क्रिटिकल केयर विशेषज्ञको संयुक्त टोली संलग्न रहेको किस्ट अस्पतालले जनाएको छ ।
उनको छातीमा निमोनियाको संक्रमण देखा परेकोले उपचार सुरु गरिएको अस्पतालले एक प्रेस विज्ञप्ति निकाल्दै जानकारी दिएको छ । अहिले उनको श्वासप्रश्वासको स्थिती र मुटुको चाल स्थिर रहेको अस्पतालले जनाएको छ । जोशीको कोरोना परीक्षण रिपोर्ट भने नेगेटिभ आएको छ ।
