सुनसान काठमाडौं र भाव विह्वल बनाउने आर्यघाट (फोटो फिचर)
कोभिड–१९ सङ्क्रमण नियन्त्रणमा लिन काठमाडौं उपत्यकामा आजदेखि निषेधाज्ञामा थप कडाइ गरिएको छ । निषेधाज्ञा जारी भएको एक महिना पुग्न लागिसक्दा पनि संक्रमण नघटेपछि उपत्यकाका जिल्ला प्रशासन कार्यालयहरुले जेठ २० गते राति १२ बजेसम्मको निषेधाज्ञालाई कडा बनाएका हुन् । उपत्यकामा वैशाख १६ गतेदेखि उक्त आदेश जारी गरी अत्यावश्यकबाहेकका गतिविधिमा रोक लगाइएको थियो ।
आजबाट लागू हुने गरी थप गरिएको निषेधाज्ञामा किराना पसल, खाद्यान्न तथा डिपार्टमेन्ट स्टोर्स पनि बन्द गरिएको छ । बिहान–बेलुकाको घुमघाम (मर्निङ र इभिनिङ वाक) मा समेत रोक लगाइएको छ ।
यसपालि निषेधाज्ञामा अत्यावश्यक खाद्य सामग्री (तरकारी, फलफूल, दूध, डेरी, मासु, खानेपानी र ग्यास) खरिद, बिक्रीका लागि बिहान ९ बजेसम्म खुला रहने भएको छ । यसअघि बिहान १० बजेसम्म खुला गरिएको थियो ।
निषेधाज्ञामा गरिएको कडाइका कारण यतिबेला काठमाडौं उपत्यकाका सडक सुनसान छन् । तर पशुपती आर्यघाट भने भरिभराउ देख्न सकिन्छ । कोरोना भाइरसका कारण ज्यान गुमाएकाहरुको दाहसंस्कार गरिरहेको यो दृश्यले साँच्चै भाव विह्वल बनाउँछ । आर्यघाटमा पुग्दा कोरोना संक्रमणका कारण ज्यान गुमाएका आफन्तहरुको रोदनले मन भकानिन्छ ।
हेर्नुहोस् काठमाडौंको स्वयम्भू, त्रिपुरेश्वर, माईतीघर, एयरपोर्ट र पशुपति आर्यघाटका यी तस्विर ।
