चीनबाट १८ हजार अक्सिजनका खाली सिलिन्डर नेपाल आइपुगे
सरकारले चीनबाट १८ हजार अक्सिजनका खाली सिलिन्डर नेपाल ल्याएको छ । उपप्रधानमन्त्री तथा कोभिड–१९ संक्रमण व्यवस्था केन्द्रका संयोजक ईश्वर पोखरेलका प्रेस सल्लाहकार गणेश पाण्डेका अनुसार स्थलमार्ग हुँदै १८ हजार सिलिन्डर तातोपानी नाकामा आइपुगेको हो । उनकाअनुसार तातोपानी नाकामा चीन सरकारले नेपाललाई सिलिन्डर हस्तान्तरण गरेपछि काठमाडौँ ल्याइनेछ ।
सिलिन्डरको अभाव हुन थालेपछि सरकारले चीन सरकारबाट अनुदानमा २० हजार खाली सिलिन्डर ल्याएको हो । यसअघि ४ सय सिलिन्डर नेपाल वायुसेवा निगमको वाइडबडी विमानबाट ल्याएको थियो । अठार हजार आइसकेपछि बाँकी एक हजार ६ सय सिलिन्डर पनि जहाजबाट ल्याउने तयारी भइरहेको छ ।
यस्तै आजै चीनबाट ५ सय ५० अक्सिजन सिलिन्डर नेपाल वायुसेवा निगमको वाइडबडी विमानले ल्याउँदैछ । शनिबार सिलिन्डर ल्याउनका लागि जहाज चीन गएको थियो । शनिबार मात्र ओमानबाट गैर–आवासीय नेपाली संघको सहयोगमा ५ सय ६० खाली सिलिन्डर आएको थियो ।
कोभिड–१९ का संक्रमितको उपचारका लागि अक्सिजन सिलिन्डरको अभाव हुन थालेपछि सरकारले विभिन्न मुलुकबाट सिलिन्डर ल्याउन थालेको छ ।
