गायक पशुपति शर्मा यतिबेला स्यङ्जामा छन् । त्यता पनि निषेधाज्ञा जारी भएकाले घरको काम सघाउँदै विभिन्न पुस्तक पढेर समय बिताइरहेका छन् । शर्माको नजरमा पढ्नै पर्ने तीन पुस्तक यस्ता छन्:

भागवत गिता

मेरो नजरमा पढ्नै पर्ने पुस्तक भन्नुपर्यो भने पहिलो नम्बरमा भागवत गीता पर्छ । यसमा जीवन के हो भन्नेबारे बुझ्न सकिन्छ । व्यवहार, जीवन र कर्म कस्तो हुनुपर्छ भन्ने कुरा यसमा दिइएको छ । सारा जीवनका लागि चाहिने कुराहरू यसमा छन् । त्यसैले गीता एकपटक पढ्नैपर्छ ।

महाभारत

संस्कृतमा लेखिएको मध्ये महाभारत एक ठूलो गन्थ हो । यो एक अद्भुत कथा हो जसले जीवन दर्शनका कुरा सिकाउँछ । घरमा फुर्सद भएको बेला यो पुस्तक पढ्दा धर्म कर्ममा पनि मन जान्छ । यसको अध्ययनले एक किसिमको शान्ती प्रप्त हुन्छ ।

४३ कथा

निलम कार्कीको कथा संग्रह ‘४३ कथा’ पनि मैले पढेको उत्कृसट पुस्तकहरु मध्ये पर्छ । ‘४३ कथा’ विभिन्न पुस्तक र फुटकर रुपमा प्रकाशित कथाहरुको एकमुष्ट सङ्ग्रह हो । यस पुस्तकले महिला, समाजसम्बन्धि थुप्रै कुरा समेटिएकाले एकपटक पढ्न सिफारिस गर्छु ।