नेपालमा भेटियो नयाँ प्रजातिको चरा ‘फुस्रो सारौं’

नेपालको अन्नपूर्ण संरक्षण क्षेत्रमा नयाँ प्रजातिको चरा भेटिएको छ । नयाँ प्रजातिको चरा ‘फुस्रो सारौं’ नाममा अभिलेख गरिएको छ । यो सँगै नेपालमा चरा प्रजातिको संख्या ८९५ पुगेको समेत पन्छीविद संघले विज्ञप्तिमार्फत जनाएको छ । चराविद शंकर तिवारीले अन्नपूर्ण संरक्षण क्षेत्रको उपल्लो मुस्ताङस्थित लोमान्थाङको ३ हजार ८४० मिटर उचाइ क्षेत्रमा उक्त चरा फेला पारेका हुन । विदेशी पाहुनाको साथमा पदयात्रा तथा चरा अवलोकन गर्ने क्रममा तिवारीले गत वैशाख २५ गते बिहान ८ बजेर ४९ मिनेटमा सो चरा देखेका थिए । तिवारीले सो चराको फोटोलाई पुष्ट्याइँका लागि नेपाल बर्ड रेकर्ड कमिटीमा पठाएका हुन ।

राष्ट्रिय–अन्तर्राष्ट्रिय पन्छीविदहरुको समेत सल्लाह सुझाव र अध्ययन पश्चात उक्त चरा नेपालका लागि नयाँ भएको निष्कर्षमा पुगेको नेपाल पन्छीविद संघले जनाएको छ । संघका अनुसार उक्त चराको अंग्रेजी नाम White-cheeked Starling  र वैज्ञानिक नाम Spodiopsar cineraceus हो । यो चरा उत्तर र पूर्वी एसियाका चीन, जापान, मंगोलिया, उत्तर कोरिया, रुस, दक्षिण कोरिया, हङकङ, ताइवान र भियतनाममा आवासीय रुपमा पाइन्छ । लाओस, म्यानमार, फिलिपिन्स र थाइल्याण्डमा फिरन्ते चराको रुपमा रेकर्ड भएको छ । यो चरा नेपालको छिमेकी देश चीनका विभिन्न ठाउँमा पाइने र त्यहाँ प्रजनन पनि गर्ने नेपाल बर्ड रेकर्ड कमिटीले जनाएको छ । नेपालका लागि नयाँ चरा अभिलेख गर्न योगदान गरेकामा कमिटीले तिवारी र सँगै रहनु भएका पदयात्री : Matthew Withraw पदयात्री लाई धन्यवाद समेत व्यक्त गरेको छ ।