शनिवारको दिन धेरैको प्रायजसो फुर्सदिलो नै हुन्छ । फुर्सदको समयमा यो दिनलाई प्रभावकारी बनाउन थुप्रै रचनात्मक कार्य गर्न सकिन्छ, जसमध्ये पुस्तक पढ्नु पनि एक हो । नायिका मिथिला शर्माको सिफारिशमा पढ्नैपर्ने तीन पुस्तक यस्ता छन् ।

योगमाया

मैले हालसालै पढेका केही पुस्तकहरूको नाम लिनु पर्दा एक नम्बरमा नीलम कार्की निहारिकाको योगमाया उपन्यासको नाम लिन्छु । नारीहरूले विभिन्न सुविधा पाई सशक्त भएर पनि योगमाया युग अर्थात् उनको तहमा पुग्न सकिरहेका छैनन् । यो पुस्तकमा यौद्धा योगमायाले कुनै पनि सुविधा विना नै समाजसँग लडेको चित्रण गरिएको छ । उनको कथा नारी मात्रै होइन, पुरुष पाठकले पनि पढ्नैपर्छ ।

हिल्डः हाउ क्यान्सर गेभ मि अ सेकेन्ड लाइफ

मनीषा कोइरालाको यो पुस्तकबाट आत्मशक्ति र पारिवारिक समर्थनको बारेमा राम्रो ज्ञान हासिल गर्न सकिन्छ । यो पुस्तकले खास गरी महिलाहरूलाई कुनै पनि रोगबाट बाहिर निकाल्न आवश्यक पर्ने भित्री शक्ति अर्थात् हाम्रो आत्मा र मन्त्रमा रहेको शक्ति र पारिवारिक सहयोगको महत्वको बारेमा बुझाएको छ ।

नयाँ छोरी

दुर्गा मैनालीको नयाँ छोरी पुस्तक पनि छुटाउनै नहुने पुस्तक हो । किनभने सन्तान जन्माएर हुर्काउनु र बढाउनु सबै अभिभावकको दायित्वका पाटा हुन् । तर, एउटा अनाथ बालबालिकाको मुहारमा मुस्कान दिएर उनीहरूको भविष्य खोजीदिने माध्यम बन्न सक्नु भनेको दायित्व पुरा गर्नुभन्दा पनि महान कार्य रहेको यस पुस्तकले चित्रण गरेको छ ।