झोलुङ्गे पुल तरेको कर प्रतिव्यक्ति २० रुपैयाँ

सङ्घीय सरकारद्वारा हालै निर्माण सम्पन्न भएपछि सञ्चालनमा आएको बागलुङ–पर्वत जोड्ने बाङ्गेचौर–अदुवाबारी झोलुङ्गे (५६७ मिटर लामो) पुलमा तरेपछि २० रुपैयाँ कर तिर्नुपर्ने भएको छ । सो पुल विश्वकै लामो दावी गरिँदै आएको छ । बागलुङ नगरपालिकाले पूर्वाधार कर भनी मङ्गलबारदेखि कर सङ्कलन शुरु गरेको छ । प्रतिव्यक्ति २० रुपैयाँ कर लिने कामको सामाजिक सञ्जालमा चर्को आलोचना भएको छ ।

अबदेखि पुलमार्फत ओहरदोहर गर्नेले प्रतिव्यक्ति २० रुपैयाँ कर बुझाउनुपर्ने हुन्छ । नगरपालिकाका प्रमुख जनकराज पौडेलले पुलकै पूर्वाधारमा खर्च गर्न कर सङ्कलन गर्ने निर्णयमा पुगेको र यो निर्णयमाथि पुनःविचार गरिने बताए । बागलुङ–पर्वत जिल्लाबासीलाई भने कर नलाग्ने नगरपालिकाले जनाएको छ । नगर प्रमुख पौडेलका अनुसार ज्येष्ठ नागरिक, अपाङ्गता भएका र विद्यार्थीलाई भने १० रुपैयाँ कर लाग्नेछ ।

मास्कविना कार्यालय र पसलमा प्रवेश गर्न रोक लगाउने र होटल तथा रेष्टुराँ बिहान ८ देखि बेलुका ८ बजेसम्म सञ्चालन गर्ने निर्णयसमेत गरिएको छ ।

मठमन्दिर प्रवेशमा रोक

बागलुङमा कोरोना भाइरसको दर बढ्दै गएपछि उच्च सतर्कता अपनाउन थालिएको छ । प्रमुख जिल्ला अधिकारीका अध्यक्षतामा मङ्गलबार बसेको जिल्ला कोभिड सङ्कट व्यवस्थापन समितिको बैठकले कोरोना जोखिमलाई ध्यानमा राखी भीडभाड कम गर्न र कोरोना नियन्त्रणका लागि मठमन्दिर प्रवेशमा वैशाख महिनासम्म रोक लगाएको छ ।

आन्तरिक पर्यटकको भीड हुने कालिका मन्दिर, पञ्चकोट, राम मन्दिरलगायत स्थानमा वैशाख मसान्तसम्म प्रवेशमा रोक लगाइएको प्रजिअ शिवकुमार कार्कीले जानकारी दिए । यस्तै बैठकले पार्टी प्यालेस, डान्स बार, सिनेमा हल, आमसभा, जिमहललगायत भीडभाड हुने स्थानसमेत वैशाख मसान्तसम्म पूर्णरूपमा बन्द गर्ने निर्णय गरेको प्रजिअ कार्कीले जानकारी दिए । मास्कविना कार्यालय र पसलमा प्रवेश गर्न रोक लगाउने र होटल तथा रेष्टुराँ बिहान ८ देखि बेलुका ८ बजेसम्म सञ्चालन गर्ने निर्णयसमेत गरिएको छ ।

यस्तै प्रशासनले बलेवामा कोरोना जोखिम बढेको जनाउँदै वडा नं १२, १३ र १४ मा वैशाख १७ गतेसम्म निषेधाज्ञा जारी गर्नेसमेत निर्णय गरेको छ । बागलुङ –१४ को जनताधन माध्यमिक विद्यालयका १९ विद्यार्थी र दुई शिक्षकसहित सोही वडाका अन्य १८ जनामा कोरोना सङ्क्रमण पुष्टि भएपछि सतर्कता अपनाउन थालिएको हो ।

मन्दिर योगमाया गौतमको नेतृत्वमा ३० वर्ष अघि पुनःनिर्माण गरिए पनि पहिराका कारण भत्केपछि अहिले पुनःनिर्माण गरिएको हो ।

मन्दिर पुनःनिर्माण

चन्दा सङ्कलन गरी बागलुङ–८ सिगानाको एक मन्दिर पुनःनिर्माण गरिएको छ । साँयकोटमा रहेको २०० वर्ष पुरानो कमलजैशीको मन्दिर पुनःनिर्माण गरिएपछि मङ्गलवार उद्घाटन गरिएको छ ।

मन्दिर योगमाया गौतमको नेतृत्वमा ३० वर्ष अघि पुनःनिर्माण गरिए पनि पहिराका कारण भत्केपछि अहिले पुनःनिर्माण गरिएको हो । स्थानीयवासीका सक्रियतामा चन्दा सङ्कलन गरी निकै जीर्ण मन्दिरको पुनःनिर्माण गरी उद्घाटन गरिएको कमलजैशी मन्दिर निर्माण समितिका अध्यक्ष गोविन्दप्रसाद गौतमले जानकारी दिए । चार लाख रुपैयाँ लागतमा मन्दिरलाई आधुनिक शैलीमा पुनःनिर्माण गरिएको हो । ढुङ्गामाटाले निर्मित मन्दिर भत्केपछि ढलान गरी पक्की बनाइएको हो ।

बागलुङ–८ वडा कार्यालयबाट एक लाख रुपैयाँ, बुछुङ–सल्लेरी सामुदायिक वनबाट २५ हजार रुपैयाँ, सिर्जनशील स्वास्थ्य आमा समूहबाट २१ हजार १११, कायमारे सामुदायिक वनाबाट १० हजार रुपैयाँ, नगरपालिकाबाट १० हजार रुपैयाँ र अन्य स्थानीयवासीबाट चन्दा सङ्कलन गरी रु चार लाखभन्दा बढी खर्चेर मन्दिर पुनःनिर्माण गरिएको हो । मन्दिर उद्घाटनका अवसरमा शिव खड्का र अर्जुन खड्काले अग्रज अभिभावकका सम्झनामा घण्ट स्थापना गरेका थिए । रासस