जग्गाको नक्शा प्रिन्ट र राजश्व तिर्न अब घरबाटै

सरकारले ‘मेरो कित्ता’ कार्यक्रम सुरु गरेको छ । यस कार्यक्रमबाट आफ्नो जग्गाधनी लालपूर्जा, आफ्नो कित्ता आफू बसेकै ठाउँबाट अनलाइनमार्फत् हेर्न, प्रिन्ट गर्न र राजश्व तिर्न सकिन्छ ।

विहिबार काठमाडौंमा आयोजित एक कार्यक्रममा प्रधानमन्त्री केपी शर्मा ओलीले सेवाग्राही दमन्ता ढुंगानालाई नक्सा प्रिन्ट हस्तान्तरण गर्दै यो सेवाको सुरुवात गरे । यो प्रणाली सुरु भएसंगै अब जग्गाधनीले नापी कार्यालय पुगेर प्रिन्ट नक्सा लिनुपर्ने झन्झट बेहोर्नु पर्दैन ।

बिहीबारदेखि नापी विभागबाट अनलाइन प्रणाली सुरु गरिएको यो सेवा पहिलो चरणमा काठमाडौं उपत्यकाका नापी कार्यालयहरूबाट सुरू हुँदैछ । विभागका सूचना अधिकारी दामोदर ढकालका अनुसार यसअन्तर्गत काठमाडौं उपत्यकाका डिल्लीबजार, कलंकी र भक्तपुरको कार्यालयमा यो सेवा लागू हुनेछ । त्यसपछि क्रमशः देशभरका १ सय २६ वटा कार्यालयबाट यस्तो सेवा दिइने छ ।

‘मेरो कित्ता डट डिओएस डट जिओभी डट एनपी’ लगइन गरेर यो सेवा लिन सकिन्छ । यो सेवा लिन सेवाग्राहीले कुनै पनि ब्राउजरबाट मेरो कित्ता लगइन गर्नुपर्नेछ । सेवाग्राहीले आफ्नो नाम, सम्पर्क नम्बर, जग्गाधनी पूर्जामा हुने कित्ता नम्बरलगायत विवरणहरू राख्नुपर्ने हुन्छ । प्राप्त विवरणलाई नापी कार्यालयले कारोबार गर्न योग्य छ÷छैन भनी प्रमाणित गर्छ ।

‘मेरो कित्ता’ कार्यक्रम लागु भएसँगै घर बनाउन, बैंकबाट ऋण लिन वा जग्गाधनीको कुनै व्यक्तिगत प्रयोजनका लागि घरमै बसी डिजिटल नक्सा प्राप्त गर्न सकिन्छ ।