भरसक बन्दाबन्दी नगर्ने पक्षमा सरकार

संस्कृति, पर्यटन तथा नागरिक उड्डयनमन्त्री भानुभक्त ढकालले कोभिड–१९ महामारी नियन्त्रणका लागि सरकारले भरसक बन्दाबन्दी लागू गर्नु नपरोस् भनेर आवश्यक तयारीमा जुटिरहेको बताएका छन् । नेपाल पर्वतारोहण संघ (एनएमए) को तीसौँ वार्षिक साधारणसभाको शनिबार उद्घाटन गर्दै मन्त्री ढकालले कोभिड महामारी नियन्त्रणका लागि सरकार लागी परेको बताए ।

‘विगतको कहालीलाग्दो अवस्थाले फेरि पनि झकझकाइरहेको छ । कोभिड महामारीको जोखिम नियन्त्रण र परिस्थितिलाई सहज बनाउने तयारीमा सरकार जुटिरहेको छ,’ ढकालले भने, ‘भरसक बन्दाबन्दी नगरी परिस्थितिलाई नियन्त्रणमा लिने प्रयत्न जारी रहन्छ, कुनै विपत्ति आइलागेमा सामना गर्नुको विकल्प पनि छैन, अहिलेको अवस्थामा सबैले सजकता अपनाउन जरुरी छ ।’

‘छिमेकी मुलुक भारतमा महामारीको कहालीलाग्दो अवस्थाले खु्ला सिमाना, रहनसहन भएको मूलुक नेपालमा त्यसको असर पर्ने खतरा छ, हामी (नेपाल) एक सय भन्दा कम संख्यामा झरिसकेको अवस्थामा हिजोआज ३ सय भन्दा बढी संक्रमित भेटिनु निकै चिन्ताको विषय हो,’ उनले भने ।

पर्यटनमन्त्री ढकालले कोभिड महामारीबाट सबैभन्दा बढी प्रभावित बनेको मूलुकको पर्यटन क्षेत्र पछिल्ला दिनमा केही सुधाराका सङ्केत देखिए पनि केही दिनदेखि लगातार बढिरहेको कोभिडका संक्रमितको संख्याले थप भयावह स्थिति सिर्जना हुने खतरा बढेको उल्लेख गरे । ‘छिमेकी मुलुक भारतमा महामारीको कहालीलाग्दो अवस्थाले खु्ला सिमाना, रहनसहन भएको मूलुक नेपालमा त्यसको असर पर्ने खतरा छ, हामी (नेपाल) एक सय भन्दा कम संख्यामा झरिसकेको अवस्थामा हिजोआज ३ सय भन्दा बढी संक्रमित भेटिनु निकै चिन्ताको विषय हो,’ उनले भने ।

एनएमएका अध्यक्ष सन्तवीर लामाले संस्थाको ४८ वर्षे इतिहासमा २४ पटक सर्वोच्च शिखर सगरमाथाको आरोहणदेखि विश्वकै जोखिम हिमाल पाकिस्तानस्थित ‘माउन्ट केटू’ को यसै वर्ष १० नेपाली आरोहीले सफलतापूर्वक आरोहणले नेपालको पर्वतीय पर्यटनलाई विश्वभर फैलाउन सफल भएको उल्लेख गरे । रासस