फागुको दिन, मन मगन
कोरोनाभाइरसका कारण विगत दुई वर्षदेखि विभिन्न प्रतिबन्धबीच उन्मुक्त भएर मनाउन पाइएको थिएन, फागु । तर यसपटक कोरोनाको कहर थिएन । यही मेसोमा यसपटक धुमधामकासाथ, नाचगानका साथ, एकआपसलाई रङ दल्दै काठमाडौंको ऐतिहासिक थलो वसन्तपुरमा युवाहरुले फागु मनाए, मस्तले ।
वसन्तपुरमा फागुको रङसँग नेपाली युवासंगै सात समुद्रपारीबाट आएका पर्यटक पनि मस्त–मगन देखिन्थे । वसन्तपुर त्यही थलो हो जहाँ तीन छत्रे होलीको चीर ठड्याइएपछि मुलुकभर होली पर्व प्रारम्भ भएको मानिन्छ ।
फागुन २६ विहान ७ बजेर २७ मिनेटको शुभसाइतमा चीर ठड्याइएको थियो । फागुन शुक्ल अष्टमीका दिन रंगीचंगी ध्वजापताका झुन्ड्याइएको बाँसको तीनतले चीर ठड्याइन्छ । रङ्गीचङ्गी कपडाका टुक्राहरु झुण्ड्याइएको तीन तले चीर ठड्याएपछि चीर पूजा गरेपछि बुझ्नुपर्छ फागु प्रारम्भ भयो ।
वसन्त उत्सवका रुपमा मनाइने रंगहरुको पर्व फागुको पौराणिक तथा सांस्कृतिक महत्व छ । वसन्त ऋतुको आगमनसँगै मनाइने भएकाले यस पर्वलाई वसन्तोत्सव वा मदनोत्सवका रुपमा लिइन्छ । आपसमा माया, प्रेम र सद्भावकासाथ खेलिने यो पर्वमा विभिन्न बाजाका साथ वसन्त राग गाउँदै अनि नाच्दै रङ लगाइन्छ । फागु मनाइन्छ ।
फोटोः किरण स्याङ्बो /मेरो लाइफस्टाइल
यो पनि…
काठमाडौँ फागु उत्सव (फोटो फिचर)
रङ्गहरूको पर्वमा रंगियो राजधानी (फोटो फिचर)
पश्चिम नेपाल पनि रङ्गीयो फागुमा (फोटो फिचर)
