विश्वमा कोरोना : भ्याक्सिन लगाएका सात जनाको मृत्यु, पछिल्लो २४ घण्टामा ५ लाख बढी संक्रमित

विश्वभरमा कोरोना संक्रमण बढीरहेको छ । पछिल्लो २४ घण्टामा विश्वमा ५ लाख ३९ हजार ६९५ जनालाई कोरोना संक्रमण भएको छ भनेँ ८ हजार ३७९ जनाको कोरोना भाइरसका कारण निधन भएको छ । भारतमा अहिले विश्वमै सबैभन्दा धेरै कोरोना संक्रमित बढीरहेका छन् । भारतमा पछिल्लो २४ घण्टामा ९२ हजार ९९८ जनालाई कोरोना संक्रमण भएको छ भनेँ, अमेरिकामा ६६ हजार १५४, टर्कीमा ४४ हजार ७५६ र ब्राजिलमा ४१ ह्जार २१८ जनालाई कोरोना संक्रमण भएको छ । यो भन्दा पहिला शुक्रवार भारतमा ८९ हजार १९, अमेरिकामा ७० हजार २२९ र ब्राजिलमा ६९ हजार ६६२ जनालाई कोरोना संक्रमण भएको थियो ।

अमेरिकामा अब हरेक दिन ३० लाख बढीलाई भ्याक्सिनेशन

अमेरिकामा लगभग एक तिहाइ जनसंख्याले अहिलेसम्म कोरोना भ्याक्सिनको पहिलो डोज लगाइसकेका छन् । ह्वाइट आउसका कोभिड डेटा डाइरेक्टर साइरस शेहपरका अनुसार देशमा १० करोड भन्दा धेरै मानिसले पहिलो डोज लगाइसकेका छन् । शुक्रवार अमेरिकामा ४० लाख बढीले भ्याक्सिन लगाएका थिए । एक हप्ता यता त्यहाँ हरेक दिन ३० लाख भन्दा धेरै मानिसले भ्याक्सिनेशन गरिरहेका छन् ।

पाकिस्तानमा वृद्धका लागि भ्याक्सिनेशन ड्राइभ भोलिबाट

पाकिस्तान सरकारले देशमा ८० वर्ष भन्दा माथिका वृद्धवृद्धाका लागि सोमवारबाट भ्याक्सिनेशन ड्राइभ चलाउने भएको छ । पाकिस्तानलाई यस हप्ताको शुरुवातमा चीनबाट केनसिनो भ्याक्सिनको ६० हजार डोज सहायता प्राप्त भएको छ । देशमा अहिलेसम्म चीनबाट मिलेको सिनोफार्म भ्याक्सिनको प्रयोग गरिरहेको छ ।

बंगलादेशमा एक हप्ता लकडाउन

बंगलादेशमा कोरोनाको नयाँ लहर तीव्र गतिले फैलिन थालेपछि ५ अप्रिलबाट त्यहाँ १ हप्ताका लागि लकडाउन गरिने भएको छ । मन्त्री अब्दुल कादिरले शनिवार बिहान यसको घोषणा गरेका थिए ।

भ्याक्सीन लगाएका ७ जनाको मृत्यु

बेलायतमा अक्सफोर्डको एस्ट्राजेनिका भ्याक्सिन लगाएपछि ७ जनाको मृत्यु भएको छ । जसकारण एकपटक फेरि यो भ्याक्सिनमाथि प्रश्न उठ्न थालेको छ ।