पल शाह प्रकरणमा पीडित बालिकामाथि बढी प्रहार भयो : महिला सांसद्
विभिन्न राजनीतिक दलका महिला सांसद्हरूले आइतबार गृहमन्त्री बालकृष्ण खाणलाई भेटेर पल शाह प्रकरणमा पीडित भनिएकी बालिकामाथि बढी प्रहार भइरहेको भन्दै रोक्न माग गरेका छन् ।
उनिहरूले स्थानीय निर्वाचनमा महिला उमेदवारको कोटा बढाउन पनि माग गरेका छन् । महिला सांसद्को टोलीमा पूर्वमन्त्री, नेपाली कांग्रेसकी सहमहामन्त्री महालक्ष्मी उपाध्याय ‘डिना’, सांसदहरू रंगमती शाही, बिन्दा पाण्डे, बिमला राई पौडेल र विना श्रेष्ठ थिए ।
उनिहरूले स्थानीय तह निर्वाचनमा ५० प्रतिशत महिला उम्मेद्वार उठाउनु पर्ने, म्यादी प्रहरी र निर्वाचन गर्ने कर्मचारी पनि ५० प्रतिशत खटाउनु पर्ने माग राखे ।
महिलाको मौलिक हक समेटिएको संविधानको धारा-३८ अनुरुप समावेशी र समानुपातिक आधारमा स्थानीय तह निर्वाचनमा कम्तिमा ५० प्रतिशत उम्मेद्वारी दिने व्यवस्था दलहरूबाट हुनुपर्ने पनि उनीहरूको थियो ।
कांग्रेस सहमहामन्त्री उपाध्यायले स्थानीय तह निर्वाचनमा महिलालाई पालिकाका उपप्रमुखमा मात्र होइन प्रमुखमा पनि निश्चित कोटा छुट्टयाउनु पर्ने माग गरिन् । वडा अध्यक्षहरूमा महिलाको संख्या कम रहेको भन्दै बढाउने पहल पनि सरकारबाट हुनु पर्ने उनको भनाइ थियो ।
त्यस्तै भिजिट भिसा र सोबाट सृजित समस्या तथा समाधानका उपायहरू सम्बन्धमा सिफारिस गर्न गठित कार्यदलको प्रतिवेदनमा संविधानसँग बाझिने विषयबस्तु समेटिएको भन्दै सच्याउन महिला सांसदहरूले माग गरेका छन् । गृहमन्त्री खाणले महिला सांसदहरूले उठाएका विषयमा सरकारको ध्यानाकर्षण भएको बताएका थिए ।
यो पनि..
पल शाह थप १२ दिन हिरासतमा
पल शाह प्रकरण : कसरी अघि बढ्दैछ कानुनी प्रक्रिया ?
पल शाहमाथिको अनुसन्धानमा आयोगको यस्तो आग्रह
