८८ दिनपछि मन्त्रीपरिषद्ले पायो पूर्णता, को–को बने मन्त्री ?

प्रधानमन्त्री शेरबहादुर देउवाले झण्डै ३ महिनापछि मन्त्रीपरिषद्लाई पूर्णता दिएका छन् । गत असार २९ गते प्रधानमन्त्री बनेका देउवाले शुक्रबार मन्त्रीपरिषद् विस्तार गरेका हुन् ।

सत्तारुढ गठबन्धनका तर्फबाट नेपाली कांग्रेस, नेकपा माओवादी केन्द्र, नेकपा (एकीकृत समाजवादी), जनता समाजवादीलाई समेट्दै देउवाले मन्त्री बनाएका हुन् । यसअघि नेपाली कांग्रेसबाट ३ मन्त्री, १ जना राज्यमन्त्री र नेकपा माओवादी केन्द्रबाट २ जना मन्त्री बनेका थिए । जसमा कांग्रेसका तर्फबाट कानून मन्त्रीमा ज्ञानेन्द्रबहादुर कार्की नियुक्त भएका थिए । उनको जिम्मेवारी हेरफेर गर्दै सञ्चार तथा सूचना प्रविधि मन्त्रालय पठाइएको राष्ट्रपति कार्यालयद्धारा जारी विज्ञप्तिमा उल्लेख छ ।

यस्तै, स्वास्थ्य तथा जनसंख्या राज्यमन्त्री उमेश श्रेष्ठलाई प्रधानमन्त्री तथा मन्त्रीपरिषद्को कार्यालय पठाइएको छ । गृहमन्त्री बालकृष्ण खाँड र परराष्ट्रमन्त्री डा. नारायण खड्का भने सोही जिम्मेवारीमा छन् । त्यस्तै, माओवादी केन्द्रका तर्फबाट अर्थमन्त्रीमा जनार्दन शर्मा र उर्जा जलस्रोत तथा सिंचाई मन्त्रीमा पम्फा भुसाल नियुक्त भएका थिए ।

आज नियुक्त भएका मन्त्रीहरुको सपथ साँझ गरिने राष्ट्रपति कार्यालयले जनाएको छ ।

को के मन्त्री बने ?

राजेन्द्रप्रसाद श्रेष्ठ – संघीय मामिला तथा सामान्य प्रशासन मन्त्रालय
बिरोध खतिवडा – स्वास्थ्य तथा जनसंख्या मन्त्रालय
डा. मीनेन्द्रप्रसाद रिजाल – रक्षा मन्त्रालय
उमाकान्त चौधरी – खानेपानी मन्त्रालय
रेनुकुमारी यादव – भौतिक पूर्वाधार तथा यातायात मन्त्रालय
प्रेमबहादुर आले – संस्कृति पर्यटन तथा नागरिक उड्डयान मन्त्रालय
दिलेन्द्रप्रसाद बडू – कानून न्याय तथा संसदीय मामिला मन्त्रालय
देवेन्द्र पौडेल – शिक्षा विज्ञान तथा प्रविधि मन्त्रालय
महिन्द्र राय यादव – कृषि तथा पशुपन्छी विकास मन्त्रालय
उमा रेग्मी – महिला बालबालिका तथा ज्येष्ठ नागरिक मन्त्रालय
शशी श्रेष्ठ – भूमी व्यवस्था, सहकारी तथा गरिबी निवारण मन्त्रालय
रामकुमारी झाक्री – सहरी विकास मन्त्रालय
गजेन्द्रकुमार हमाल – उद्योग वाणिज्य तथा आपूर्ति मन्त्रालय
रामसहाय प्रसाद यादव – वन तथा वातावरण मन्त्रालय
कृष्णकुमार श्रेष्ठ – श्रम रोजगार तथा सामाजिक सुरक्षा मन्त्रालय
महेश्वरजंग गहतराज – युवा तथा खेलकुद मन्त्रालय
भवानीप्रसाद खापुङ – राज्यमन्त्री (स्वास्थ्य तथा जनसंख्या मन्त्रालय)
बोधमायाकुमारी यादव – राज्यमन्त्री (शिक्षा विज्ञान तथा प्रविधि मन्त्रालय)