यी हुन् कान दुख्नुका कारण, कसरी बच्ने ?

मानव शरीरको महत्वपूर्ण अंग मध्ये एक हो – कान । यद्यपि, धेरै मानिसमा कान दुख्ने समस्याले हैरानी बनाएको छ । धेरैले यसलाई सामान्य ठानेर बेवास्ता गर्छन् । तर, कान दुखाई केहि समय वा लामो समयको लागि रहन सक्छ । यसको पीडा हल्का र बढी पनि हुन सक्छ । कानमा संक्रमण बाहेक, कान दुखाईका अन्य कारणहरू पनि छन् । त्यसैले यहाँ कान दुख्नुका कारण र बच्ने उपायका बारे नाक कान घाँटी रोग विशेषज्ञ डा. ढुण्डिराज पौडेलको सुझाव यस्तो छ :

कान दुख्ने कारणहरु

– हाम्रो टाउकोमा नाकदेखि कानसम्म जोड्ने एउटा नली रहेको हुन्छ, विविध कारणवस उक्त नली ब्लक भएमा
– नाक, कान तथा घाँटीको ब्याक्टेरिया संक्रमण भएमा
– कान पाक्ने समस्याले गर्दा
– कानमा इन्फेक्सन वा कुनै एलर्जी भयो भने
– कानको सम्पूर्ण भागको नलीमा रहेको मासुको संक्रमण भएको खण्डमा
– कानमा फोहोर जम्मा भएमा
– कानभित्र पानी पसेमा
– कानमा किरा वा अन्य कुरा पसेमा
– बारम्बार कान कोट्याउने बानी
– रुघाखोकी
– टन्सिल
– खाने नलीमा संक्रमण
– कान तथा घाँटीको नशामा समस्या
– गर्धनको दुखाई
– बेस्सरी सिँगान पुछ्दा वा सिँ–सिँ गर्दा
– खाने नलीको क्यान्सर
– वातावरणीय चाँप–उकालो चढ्दा तथा ओरालो झर्दा कानको जाली टाँसिएर पनि कान दुख्छ ।

बच्ने उपाय तथा उपचार

– कानमा तेल, दुध तथा तुलसी पत्ताको रस जस्ता तरल पदार्थहरु नहाल्ने ।
– रुघाखोकीको उपयुक्त उपचार र हेरचाह गर्ने ।
– कानको समस्या भएमा चिकित्सकको परामर्श लिने ।
– जेले भेट्यो त्यहीले कान कोट्याउन वा कानेगुजी निकाल्ने काम नगर्ने ।
– कानलाई फोहोर मैलाबाट जोगाउने ।
– रुघाखोकी लागेको बेला होस् या अन्य समयमा धेरै सिँ–सिँ नगर्ने ।
– चिकित्सकको सल्लाह बिना कुनै पनि औषधि प्रयोग नगर्ने ।
– अस्पताल गएर चिकित्सकको सल्लाहमा मात्र औषधिको सेवन गर्ने ।
– नाक तथा घाँटीको समस्याले पनि कान दुखेको हुन सक्छ त्यसैले उपचारको लागि अस्पताल जाँदा कान सँगै नाक र घाँटीको पनि जाँच गराउने ।