सार्वजनिक यातायातको जोरबिजोर हट्यो, अब के–के खुल्न बाँकी ?
काठमाडौं उपत्यकाको सार्वजनिक यातायातमा लागू भएको जोर–बिजोर प्रणाली हटेको छ । काठमाडौं उपत्यका (काठमाडौं, भक्तपुर, ललितपुर) का प्रमुख जिल्ला अधिकारीको आइतबार बसेको संयुक्त बैठकले निषेधाज्ञालाई केही खुकुलो बनाउँदै उक्त निर्णय गरेको हो ।
जिल्ला प्रशासन कार्यालय काठमाडौंद्धारा जारी आदेशमा काठमाडौं उपत्यकाभित्र सञ्चालन हुने सार्वजनिक सवारी साधनहरु सिट क्षमता अनुसार स्वास्थ्य मापदण्ड पालना गरी चलाउनुपर्ने जनाइएको छ ।
साथै, असार ३१ सम्म निषेधाज्ञा थप गरिएको काठमाडौंका प्रमुख जिल्ला अधिकारी कालीप्रसाद पराजुलीले बताए । यसैगरी औषधि तथा स्वास्थ्य सामग्री सम्बन्धि सबै पसल जुनसुकै समयमा निर्बाध सञ्चालन गर्न पाइनेछ । अन्य पसल तथा व्यवसायहरु स्वास्थ्य मापदण्ड पालना गरेर साँझ ६ बजेसम्म खोल्न पाइने आदेशमा उल्लेख छ ।
त्यस्तै, अत्यावश्यक वस्तुहरुको अनलाइन अर्डर, रेष्टुरेन्ट एवं फास्टफुड तथा अन्य अर्डरहरु टेक अवे वा होम डेलिभरी प्रयोजनका लागि ७ बजेसम्म सञ्चालन गर्न पाइने जनाइएको छ । परीक्षा तथा अन्य विषयको हकमा २५ जनाभन्दा बढी मानिसहरु भेला नहुनेगरी सञ्चालन गर्न पाइने उल्लेख छ ।
के–केमा निषेध ?
सबै प्रकारका सभा, सम्मेलन, सिनेमा हल, पार्टी प्यालेस, डान्सबार, दोहोरी, नाचघर, क्लब, स्वीमिङ पुल, सैलुङ, ब्युटी पार्लर, फुटसल, जिमखाना, पुस्तकालय, चिडियाखाना लगायतालाई सञ्चालनमा निषेध गरिएको छ ।
यस्तै, विवाह व्रतवन्ध तथा सामूहिक रुपमा गरिने सांस्कृतिक कार्यहरु होटल तथा पार्टी प्यालेसमा गर्न नपाइने उल्लेख छ । नित्य पूजाबाहेकका धार्मिक तथा सांस्कृतिक गतिविधि, शैक्षिक संस्थानहरुमा भौतिक उपस्थितिमा पठनपाठनमा रोक लगाइएको जनाइएको छ ।
आदेश :
