चुनावसँगै तात्तियो सेयर बजार

लामो समयपछि पुँजी बजार बल्ल सकारात्मक गतिमा देखिएको छ । निरन्तर घट्दोक्रममा रहेको नेप्सेले आइतबार आकर्षक छलाङ मारेको छ । सूचकका साथमा कारोबार रकम (टर्नओभर) मा वृद्धि भएको छ । यस दिन नेप्से सूचक ९५.४६ अंकले बढेर २४२०.९१ विन्दुमा आइपुगेको छ । २ अर्ब ५३ करोड रुपैयाँभन्दा बढीको सेयर कारोबार भएको छ । २ दर्जनभन्दा बढी कम्पनीमा सकारात्मक सर्किट लागेको छ ।

९ महिनादेखि करेक्सन फेजमा गएको बजार पछिल्लो समय पुनः घट्दै २३ सय विन्दुभन्दा तल झरेको थियो । यसबीचमा लगानीकर्ताले खरबौं रुपैयाँ गुमाए । निरन्तर बजार घटेपछि बजारमा भाउहरू निकै सस्तो भइसकेको छ । ५२ हप्ताकै न्यून विन्दुमा भाउ आइपुगेको छ । यसैगरी, पीई रेसियो हेर्दा पनि धेरैको भाउ २० भन्दा तल आइसकेको अवस्था हो । सोही कारण लगानीकर्ताहरु एकाएक आकर्षित भएको अनुमान छ ।

पुँजी बजारका लागि अहिले सकारात्मक माहोल बनिरहेको छ । आइतबारबाट स्थानीय निकाय निर्वाचनका लागि उम्मेदवारहरूको मनोनय दर्ता सुरु भएको छ । यससँगै चुनावी चहलपहल थप बढेको छ । चुनावी माहोलमा सेयर बजार सकारात्मक हुने अपेक्षा गर्रिएको छ । दल तथा उम्मेदवारले पैसा खर्च गर्ने भएकाले उक्त पैसा बजारमा आउनेछ । यसले तरलता सहज बनाउने सहयोग गर्ने अपेक्षा गरिएको छ ।

अहिले तरलता अवस्था टाइट भएकाले मात्र बजारले तत्काल अपेक्षा अनुसार पोजेटिभ रेस्पोन्स देखाउन नसकेको विश्लेषणहरु भइरहेका छन् । हाम्रो बजार झन्डै ९ महिनायतादेखि करेक्सन फेजमा छ । यसमा बीचमा उतारचढावहरु भइरहे पनि यसअघि तय भएको ३२ सय विन्दुको उचाइलाई बजारले पार गर्न सकेको छैन । नयाँ बुल रन तयार हुनका लागि नेप्सेले यही ३२ सय विन्दुलाई पार गरेर माथि जानुपर्ने हुन्छ ।

बजार घट्दा होस् वा बढ्दा, लगानीकर्ताले कम्पनीहरुले सार्वजनिक गरेका वित्तीय विवरणहरू, सम्बद्ध कम्पनीको व्यवस्थापन र सञ्चालकहरूका बारेमा पनि अध्ययन गर्नुपर्छ । सबल वित्तीय सूचक भएका कम्पनीहरूमा सकेसम्म दीर्घकालीन हिसाबले लगानी गर्न सके लाभ लिन सकिने अनुभवीहरु बताउँछन् । रिस्क–रिवार्ड रेसियोलाई ख्याल गर्दै लगानीसम्बन्धी निर्णय लिन अनुभवीहरूले सुझाव दिने गरेका छन् ।

यस दिन २३८ कम्पनीको ६६ लाख ३९ हजारभन्दा बढी कित्ता सेयर कारोबार भएको छ । सबै समूहका सूचकमा हरियाली छाएको छ । फाइनान्स, हाइड्रोपावर, विकास बैंक, बिमा लगायतका समूहहरू सबैभन्दा बढी बढेका छन् । २२ करोड रुपैयाँभन्दा धेरैसहित कारोबार रकममा सिद्धार्थ बैंकको संस्थापक सेयरको अग्रता रहेको छ । यसैगरी, दोस्रो र तेस्रो स्थानमा क्रमशः शिवम् सिमेन्ट्स र अरुण भ्याली हाइड्रोपावर परेका छन् ।

यो पनि…
धानमा आत्मनिर्भर हुन ६ लाख ६८ हजार मेट्रिक टनको खाँचो
कृषिप्रधान देश : आठ महिनामा ३७ अर्ब रुपैयाँको धान-चामल आयात