सार्वजनिक यातायातका चालक र सहचालकलाई पनि कोभिड खोप
काठमाडौं– सार्वजनिक यातायातका चालक तथा सहचालकलाई पनि कोभिड–१९ विरुद्धको खोप लगाइने भएको छ । स्वास्थ्य तथा जनसंख्या मन्त्रालयको ३० चैतमा बसेको सचिव स्तरीय बैठकले सार्वजनिक यातायातका चालक र सहचालकलाई पनि खोप लगाउने निर्णय गरेको हो ।
उक्त बैठकले अहिले कोभिड खोप (भेरोसेल) अभियानलाई ५ बैशाखसम्म निरन्तरता दिने र हाल सञ्चालित कोभिड खोप अब ४० देखि ५९ वर्ष उमेरसमूहका मानिसलाई पनि लगाइने निर्णय भएको स्वास्थ्य सेवा विभाग परिवार कल्याण महाशाखाका निर्देशक डा. तारानाथ पोखरेलले जानकारी दिए ।
चीन सरकारबाट अनुदानमा पाएको कोभिड–१९ विरुद्धको भेरोसेल खोपलाई सरकारले २५ चैतबाट लगाउन सुरु गरेको थियो ।
