वार्ताका लागि यी हुन् रूसका मुख्य माग
रूसका राष्ट्रपति भ्लादिमिर पुटिनले युक्रेनसँग शान्ति सम्झौताका लागि आफ्ना टर्किस समकक्षीसमक्ष मागहरू अगाडि सारेका छन् । बीबीसीका अनुसार टेलिफोनवार्तामा पुटिनले रेजेप तय्यीप एर्दोआनलाई रूसका ठोस मागहरू बताएका हुन् ।
टर्किस अधिकारीहरूले रूसका मागहरू दुई भागमा बाँडिएको बताए । उनीहरूका अनुसार रूसी मागहरू पूरा गर्न युक्रेनलाई धेरै गाह्रो छैन ।
तीमध्ये एउटा प्रमुख माग भनेको युक्रेन तटस्थ बस्नुपर्ने र उत्तर एट्लान्टिक सन्धि सङ्गठन नेटोको सदस्यताका लागि अघि बढ्न नहुने रहेको छ । युक्रेनी राष्ट्रपति भोलोदिमिर जेलेन्स्कीले यो मागलाई स्वीकारिसकेका छन् ।
युक्रेनमा रूसी भाषालाई संरक्षण गर्नुपर्ने र सार्वजनिक जीवनबाट नाजीवादका सबै अवशेष एवम् प्रभावको अन्त्य हुनुपर्ने माग रूसको छ ।
बीबीसीको भनाइमा यो माग चाहिँ जेलेन्स्कीका लागि अपमानजक छ । जेलेन्स्की आफैं एक यहुदी हुन् र उनका पनि केही आफन्तहरू यहुदी नरसंहारमा मारिएका थिए । तर रूसको त्यो माग पनि पूरा गर्न जेलेन्स्कीलाई खासै गाह्रो नहुने टर्कीको विश्वास छ ।
